വയനാട് : മുള്ളങ്കൊല്ലിയിൽ പരിക്കേറ്റ നിലയിൽ ജനവാസ മേഖലയിൽ കണ്ടെത്തിയ കുട്ടിക്കൊമ്പൻ ചരിഞ്ഞു. മുത്തങ്ങ ആനപ്പന്തിയിൽ ചികിത്സയിലായിരുന്നു. ഈ മാസം പത്തിനാണ് മാനന്തവാടി കാട്ടിക്കുളം എടയൂർകുന്നിൽ ജനവാസകേന്ദ്രത്തിൽ ആനക്കൂട്ടത്തിൽ നിന്ന് ഒറ്റപ്പെട്ട നിലയിൽ കുട്ടി കൊമ്പനെ കണ്ടെത്തിയത്.
ഇന്നു പുലർച്ചയോടെയാണ് കുട്ടിക്കൊമ്പൻ ചരിഞ്ഞത്. കടുവയുടെ ആക്രമണത്തിൽ ഇടതു കാലിനും തുമ്പിക്കൈക്കും അടക്കം പതിനേഴോളം മുറിവുകളാണ് കുട്ടി കൊമ്പന്റെ ദേഹത്ത് ഉണ്ടായിരുന്നത്. ജനവാസ മേഖലയിൽ കണ്ടെത്തിയതിനുശേഷം വനംവകുപ്പ് കുട്ടിയാനയ്ക്ക് ചികിത്സ നൽകിയശേഷം ബേഗൂർ റേഞ്ച് വനത്തിൽ വിട്ടിരുന്നു. എന്നാൽ ആനകൾ ഈ കുട്ടിക്കൊമ്പനെ കൂട്ടത്തിൽ ചേർക്കാതിരുന്നതോടെ വീണ്ടും ജനവാസ മേഖലകളിലേക്ക് ഇറങ്ങുകയായിരുന്നു.
തുടർന്ന് വനംവകുപ്പ് ഉദ്യോഗസ്ഥർ കുട്ടിയാനയെ പിടികൂടി മുത്തങ്ങ ആനപ്പന്തിയിൽ എത്തിച്ചു. തുടർ ചികിത്സ നൽകിയെങ്കിലും ഇന്നലെ രാത്രിയോടെ കുട്ടിക്കൊമ്പന്റെ നില വഷളാവുകയായിരുന്നു. വൈൽഡ് ലൈഫ് വാർഡൻ വരുൺ ഡാലിയ, ബേഗൂർ റെയിഞ്ചർ എസ്. രഞ്ജിത്ത് കുമാർ എന്നിവരുടെ നേതൃത്വത്തിൽ ചീഫ് ഫോറസ്റ്റ് വെറ്ററിനറി സർജൻ ഡോ.അരുൺ സക്കറിയ, ഫോറസ്റ്റ് വെറ്ററിനറി സർജൻ ഡോ.അജേഷ് മോഹൻദാസ് എന്നിവരടങ്ങുന്ന വിദഗ്ധസംഘം പോസ്റ്റ്മോർട്ടം നടത്തി ജഡം സംസ്കരിച്ചു.
