കൊച്ചി: യുവഡോക്ടർ ഷഹന ജീവനൊടുക്കിയ കേസിൽ പ്രതിയായ ഡോക്ടർ റുവൈസ് നൽകിയ ജാമ്യഹർജിയിൽ സർക്കാരിന്റെ വിശദീകരണം തേടി ഹൈക്കോടതി. ഷഹനയുടെ ആത്മഹത്യയിൽ തനിക്ക് പങ്കില്ലെന്നും മാധ്യമവാർത്തകളുടെ അടിസ്ഥാനത്തിലാണ് തനിക്കെതിരെ കേസെടുത്തതെന്ന് കോടതിയിൽ സമർപ്പിച്ച ഹർജിയിൽ റുവൈസ് പറഞ്ഞു.
വിവാഹം എത്രയും വേഗം നടത്തണമെന്ന് ഷഹന തന്നെ നിർബന്ധിച്ചിരുന്നുവെന്നും ഇതിന് താൻ തയ്യാറായിരുന്നില്ലെന്നും ഹർജിയിൽ റുവൈസ് ചൂണ്ടിക്കാട്ടിയിരുന്നു. പഠനത്തിന് ശേഷം വിവാഹം നടത്താമെന്നായിരുന്നു തൻ്റെ നിലപാടെന്നും റുവൈസ് പറഞ്ഞു. റുവൈസിൻ്റെ ഹർജി തിങ്കളാഴ്ച കോടതി പരിഗണിക്കും. അതേസമയം റുവൈസിന്റെ പിതാവ് അബ്ദുൽ റഷീദിന് ഹൈക്കോടതി മുൻകൂർ ജാമ്യം അനുവദിച്ചു.
മുൻപ് റുവൈസ് സമർപ്പിച്ച ജാമ്യാപേക്ഷ തള്ളിയിരുന്നു. റുവൈസ് ചെയ്ത കുറ്റം അതീവ ഗൗരവമുള്ളതാണെന്ന് നിരീക്ഷിച്ച കോടതി പ്രതിക്ക് ജാമ്യം നൽകിയാൽ അത് കേസ് അന്വേഷണത്തെ ബാധിക്കുമെന്ന പ്രോസിക്യൂട്ടറുടെ വാദം പരിഗണിച്ചാണ് പ്രതിയുടെ ജാമ്യാപേക്ഷ തള്ളിയത്.
പ്രതി റുവൈസും വീട്ടുകാരും ചേർന്ന് വൻതുക സ്ത്രീധനമായി ആവശ്യപ്പെട്ടതിനെ തുടർന്നാണ് തിരുവനന്തപുരം വെഞ്ഞാറമൂട് സ്വദേശിനി ഡോ ഷഹ്ന ജീവനൊടുക്കിയത്. ‘അവരുടെ സ്ത്രീധനമോഹം മൂലം എന്റെ ജീവിതം അവസാനിപ്പിക്കുന്നു എന്ന് തുടങ്ങി ഒരു ആത്മഹത്യാക്കുറിപ്പ് എഴുതിവച്ചാണ് ഷഹന ആത്മഹത്യ ചെയ്തത്.
ഒ പി ടിക്കറ്റിന്റെ പിറകിലായി ഡോ ഷഹന എഴുതിയ ആത്മഹത്യാക്കുറിപ്പിൽ റുവൈസിന്റെ പേര് പറഞ്ഞതും ഷഹനയുടെ ബന്ധുക്കളുടെ മൊഴികളും സാഹചര്യത്തെളിവുകളും ചേർത്താണ് പോലീസ് റുവൈസിനെ പ്രതി ചേര്‍ത്തതും പിന്നാലെ അറസ്റ്റ് രേഖപ്പെടുത്തിയതും.