ശബരിമല: സ്ത്രീ പ്രവേശനവുമായി ബന്ധപ്പെട്ട് കഴിഞ്ഞ മണ്ഡലകാലത്തുണ്ടായ പ്രശ്‌നങ്ങളും സംസ്ഥാനത്ത് വര്‍ധിച്ചുവരുന്ന തീവ്രവാദ ഭീഷണിയുമെല്ലാം കണക്കിലെടുത്ത് ശബരിമലയില്‍ സുരക്ഷ സംവിധാനങ്ങള്‍ ശക്തവുമാക്കാന്‍ പോലീസ് തീരുമാനിച്ചു. സ്‌ഫോടക വസ്തുക്കള്‍ കണ്ടെത്താന്‍ സഹായിക്കുന്ന എക്‌സ്‌പ്ലോസീവ് ഡിറ്റക്ടറുകള്‍, പോര്‍ട്ടബിള്‍ എക്‌സ് റേ മെഷിനുകള്‍, വാഹനങ്ങളുടെ അടിഭാഗം പരിശോധിക്കാന്‍ കഴിയുന്ന ബോട്ടം ഇന്‍സ്‌പെക്ഷന്‍ മെഷിനുകള്‍ എന്നിവയ്ക്കുള്ള ടെണ്ടറുകള്‍ കേരള പോലീസ് ക്ഷണിച്ചു കഴിഞ്ഞു.
ശബരിമലയിലെ സുരക്ഷ സംവിധാനങ്ങള്‍ കൂടുതല്‍ ശക്തിപ്പെടുത്താന്‍ വേണ്ടിയാണിതെന്ന് പോലീസ് വ്യക്തമാക്കിയിട്ടുണ്ട്.വിദേശ നിര്‍മിത ഉത്പന്നങ്ങളും വാങ്ങാന്‍ ഉദ്ദേശിക്കുന്നുണ്ട്. വാഹനങ്ങളുടെ അടിഭാഗം സ്‌കാന്‍ ചെയ്ത് പരിശോധിക്കാന്‍ കഴിയുന്ന സംവിധാനം ഉപയോഗിച്ച് ശബരിമലയിലേക്കുള്ള എല്ലാ വാഹനങ്ങളും പരിശോധിക്കും. വാഹനത്തിനകത്ത് ഏതെങ്കിലും തരത്തിലുള്ള സ്‌ഫോടകവസ്തുക്കളോ മറ്റും ഒളിപ്പിച്ചു വച്ചിട്ടുണ്ടോ എന്ന് കണ്ടെത്താന്‍ ഇത്തരം ബോട്ടം സ്‌കാന്‍ സംവിധാനത്താല്‍ സാധിക്കും.
