ബാലനടിയായി അരങ്ങേറ്റം കുറിച്ച് മലയാള സിനിമയില്‍ നായിക വേഷത്തിലേക്കെത്തിയ താരമാണ് സനൂഷ. പിന്നീട് മലയാളത്തിന് പുറമെ തെന്നിന്ത്യയിലെ മറ്റു ഭാഷകളിലും അഭിനയ മികവ് കാഴ്ച വെച്ചുകഴിഞ്ഞു താരം. അതിനിടെ കാഴ്ച എന്ന സിനിമയില്‍ സൂപ്പര്‍ താരം മമ്മൂട്ടിയുമായി അഭിനയിച്ചപ്പോള്‍ ഉണ്ടായ വ്യത്യസ്ത നിമിഷങ്ങളെക്കുറിച്ച് പങ്കുവെച്ചിരിക്കുകയാണ് സനൂഷ.
‘കാഴ്ച’ സിനിമയുടെ സെറ്റില്‍ മറ്റൊരു മമ്മുക്കയായിരുന്നു ഞാന്‍ കണ്ടത്. ബാലരമയ്ക്കൊക്കെ വേണ്ടി അദ്ദേഹം ഞങ്ങളോട് അടികൂടിയിട്ടുണ്ട്. ലൊക്കേഷനില്‍ എത്തുമ്പോള്‍ സ്ട്രോബറിയൊക്കെ കൊണ്ട് വരും. ഞങ്ങള്‍ക്ക് സമ്മാനങ്ങള്‍ തരും.
ആ സിനിമയില്‍ മമ്മുക്കയുടെ കഥാപാത്രം കാണിക്കുന്ന അതേ സ്നേഹവും വാത്സല്യവും ചിത്രീകരണം ഇല്ലാത്തപ്പോഴും കാണിച്ചിരുന്നു. ഇപ്പോള്‍ കണ്ടാലും പഠനത്തില്‍ ശ്രദ്ധിക്കണം ഉഴപ്പരുത് സിനിമ ശ്രദ്ധിക്കണം എന്നൊക്കെ പറയും. ‘കാഴ്ച’ സിനിമയെ ഓര്‍ക്കുമ്പോള്‍ ഇന്നും മനസ്സില്‍ നില്‍ക്കുന്നത് ഒരപകടമാണ്. ചിത്രീകരണത്തിനിടെ ഒരിക്കല്‍ ക്യാമറ വെള്ളത്തിലേക്ക് വീണുപോയി.
ആ സമയം പകുതിയോളം ഷൂട്ട് കഴിഞ്ഞിരുന്നു, ഞങ്ങളെല്ലാവരും പേടിച്ചു. ആ സമയത്തില്‍ ഫിലിം അല്ലെ ഒന്നും സംഭവിക്കരുതേ എന്ന് പ്രാര്‍ത്ഥിച്ചത് ഓര്‍മ്മയുണ്ട്. ദൈവം കാത്തു ഒന്നും നഷ്ടപ്പെട്ടിട്ടില്ല. മലയാളത്തിലെ ഒരു പ്രമുഖ മാധ്യമത്തിനു നല്‍കിയ അഭിമുഖത്തിലായിരുന്നു കാഴ്ച സിനിമയെക്കുറിച്ച് സനൂഷ വീണ്ടും മനസ്സ് തുറന്നത്.
