Sunitha williams🎙ശരീരഭാരം കുറഞ്ഞിട്ടില്ല,കവിളൊട്ടിയത് എങ്ങനെയെന്ന്‌ സുനിത; മാറ്റങ്ങൾക്ക് കാരണമിതാണ്‌

മുംബൈ:അന്താരാഷ്ട്ര ബഹിരാകാശ നിലയത്തില്‍ (ഐ.എസ്.എസ്.) കഴിയുന്ന തന്റെ ആരോഗ്യനിലയെക്കുറിച്ചുള്ള ആശങ്കകള്‍ക്കും ഊഹാപോഹങ്ങള്‍ക്കും മറുപടി നല്‍കി നാസയുടെ ബഹിരാകാശ യാത്രികയായ സുനിത വില്യംസ്. താന്‍ ഇവിടെ എത്തുമ്പോഴുണ്ടായിരുന്ന അതേ ശരീരഭാരമാണ് ഇപ്പോഴുള്ളതെന്നും ബഹിരാകാശ യാത്രികര്‍ ചെയ്യുന്ന കഠിനമായ വ്യായാമമുറകളാണ് ശാരീരികമായ മാറ്റങ്ങള്‍ക്ക് കാരണമെന്നും സുനിത വില്യംസ് പറഞ്ഞു.

അന്താരാഷ്ട്ര ബഹിരാകാശ നിലയത്തില്‍നിന്ന് നല്‍കിയ വീഡിയോ അഭിമുഖത്തിലായിരുന്നു സുനിതയുടെ പ്രതികരണം. ബഹിരാകാശനിലയത്തില്‍ ദിവസേന ചെയ്യുന്ന വ്യായാമങ്ങളെക്കുറിച്ചും സുനിത വില്യംസ് അഭിമുഖത്തില്‍ വിശദീകരിക്കുന്നുണ്ട്.

എക്‌സേസൈക്കിള്‍, ട്രെഡ്മില്‍, വെയിറ്റ്‌ലിഫ്റ്റിങ് തുടങ്ങിയ വ്യായാമങ്ങളാണ് ബഹിരാകാശനിലയത്തില്‍ പതിവായി ചെയ്യാറുള്ളതെന്നാണ് സുനിത പറയുന്നത്. തന്റെ തുടകളും അരക്കെട്ടും അല്‍പം വലുതാണ്. വെയിറ്റ്‌ലിഫ്റ്റിങ് കാരണമാണ് ഈ മാറ്റങ്ങളുണ്ടായതെന്നും സുനിത വില്യംസ് പറഞ്ഞു.

അടുത്തിടെ പുറത്തുവന്ന സുനിതയുടെ ചില ചിത്രങ്ങളാണ് അവരുടെ ആരോഗ്യനിലയെക്കുറിച്ചുള്ള അഭ്യൂഹങ്ങള്‍ക്ക് കാരണമായത്. ചിത്രങ്ങളില്‍ കവിള്‍ ഒട്ടിയനിലയില്‍ സുനിതയെ കണ്ടതോടെ ഡോക്ടര്‍മാര്‍ അടക്കം അവരുടെ ആരോഗ്യനിലയില്‍ ആശങ്കപ്രകടിപ്പിച്ചിരുന്നു. ദീര്‍ഘമായ ബഹിരാകാശവാസത്തിന്റെ ഫലമാണിതെന്നും ആവശ്യമായ പോഷകങ്ങൾ കിട്ടാത്തതാവാം കവിളൊട്ടാന്‍ കാരണമെന്നുമായിരുന്നു ഡോക്ടര്‍മാര്‍ പറഞ്ഞിരുന്നത്.

ബഹിരാകാശനിലയത്തില്‍ കഴിയുന്ന സുനിത വില്യംസിന്റെയും ബുച്ച് വില്‍മോറിന്റെയും ആരോഗ്യനിലയില്‍ ആശങ്ക വേണ്ടെന്നും ഇരുവരുടെയും ആരോഗ്യം നല്ലസ്ഥിതിയിലാണെന്നുമായിരുന്നു നാസയുടെ പ്രതികരണം. ഐ.എസ്.എസിലെ എല്ലാ യാത്രികര്‍ക്കും ഫ്‌ലൈറ്റ് സര്‍ജന്‍ പതിവായി വൈദ്യപരിശോധന നടത്താറുണ്ട്. ആര്‍ക്കും ആരോഗ്യപ്രശ്‌നമില്ലെന്നും നാസ വ്യക്തമാക്കിയിരുന്നു.

സ്റ്റാര്‍ലൈനര്‍ പേടകത്തിന്റെ സാങ്കേതികത്തകരാറിനെത്തുടര്‍ന്നാണ് സുനിതാ വില്യംസിനും ബുച്ച് വില്‍മോറിനും ദീര്‍ഘനാളുകളായി ബഹിരാകാശനിലയത്തില്‍ കഴിയേണ്ടിവരുന്നത്. എട്ടുദിവസംമാത്രം ബഹിരാകാശ നിലയത്തില്‍ കഴിയേണ്ടിയിരുന്ന സുനിതയും വില്‍മോറും 150-ലേറെ ദിവസം അവിടെ ചെലവിട്ടുകഴിഞ്ഞു. ജൂണ്‍ ആറുമുതല്‍ ബഹിരാകാശ നിലയത്തില്‍ കുടുങ്ങിക്കിടക്കുന്ന ഇരുവരും 2025 ഫെബ്രുവരിക്കുശേഷം തിരിച്ചെത്തുമെന്നാണ് പ്രതീക്ഷിക്കുന്നത്.