കൊച്ചി: തൃപ്പുണിത്തുറയിലെ കോണ്‍ഗ്രസ് സ്ഥാനാര്‍ഥി കെ ബാബുവിന്റെ ആകെ ആസ്തി 2,14,74,880 രൂപ. നാമനിര്‍ദേശ പത്രികയ്‌ക്കൊപ്പം സമര്‍പ്പിച്ച സത്യവാങ്മൂലത്തിലാണ് സ്വത്ത് വകകള്‍ വ്യക്തമാക്കുന്നത്. 1,00,79,072 രൂപയുടെ ആസ്തി ബാബുവിന്റെ പേരിലും 1,13,95,808 രൂപയുടെ ആസ്തി ഭാര്യയുടെ പേരിലുമായാണ് ഉള്ളത്.
ബാബുവിന്റെ പക്കല്‍ 40,000 രൂപയും ഭാര്യയുടെ കയ്യില്‍ രണ്ടായിരം രൂപയുമുണ്ട്. 11,50,000 രൂപ വിലമതിക്കുന്ന കാറും, 2009 മോഡല്‍ സ്‌കൂട്ടറും ബാബുവിന്റെ പേരിലുണ്ട്. ബാബുവിന്റെ പക്കല്‍ സ്വര്‍ണം ഇല്ല. ഭാര്യക്ക് 8,40,000 രൂപ വിലമതിക്കുന്ന 200 ഗ്രാം സ്വര്‍ണമുണ്ട്.
32.13 കോടിയുടെ സ്വത്താണ് മൂവാറ്റുപുഴയിലെ യുഡിഎഫ് സ്ഥാനാര്‍ഥിയായ മാത്യു കുഴല്‍നാടന്റെ പേരിലുള്ളത്. ഭാര്യ എല്‍സ കാതറിന്‍ ജോര്‍ജിന്റെ പേരില്‍ 95.2 ലക്ഷത്തിന്റെ സ്വത്തുണ്ട്. മകന്‍ ആര്‍ഡന്‍ എബ്രഹാം മാത്യുവിന് 6.7 ലക്ഷം രൂപയുടെ എല്‍ഐസി പരിരക്ഷയുണ്ട്. 25 ലക്ഷമാണ് മാത്യു കുഴല്‍നാടന്റെ ആകെ ബാധ്യത. കുഴല്‍നാടന് 11,66,152 രൂപയും ഭാര്യക്ക് 6,63,226 രൂപയും ആണ് പണമായുള്ളത്.
ദുബായ് കരിയര്‍ ഹൗസ് കമ്യൂണിക്കേഷനില്‍ ഒമ്പത് കോടിയുടെയും കെഎംഎന്‍പി ലോ ഫേമിന്റെ ഡല്‍ഹി, കൊച്ചി, ഗുവാഹതി, ബംഗളൂരു ഓഫീസുകളിലായി 10.33 കോടിയുടേയും ബോണ്ട്, ഓഹരി സമ്പാദ്യം കുഴല്‍നാടനുണ്ട്. 14 ലക്ഷം രൂപ വിലമതിക്കുന്ന ഇന്നോവയും, 23 ലക്ഷത്തിന്റെ ബെന്‍സും കുഴല്‍നാടന്റെ പേരില്‍ വാഹനമായുണ്ട്. 4.5 കോടി വിലമതിക്കുന്ന 5.88 ഏക്കര്‍ സ്ഥലം കടവൂരും, എറണാകുളം എളംകുളത്ത് 55 ലക്ഷം വിലമതിക്കുന്ന ഫ്‌ളാറ്റുമുണ്ട്.
എറണാകുളത്ത് 2.2 കോടി വിലമതിക്കുന്ന ഷോപ്പിങ് കോംപ്ലക്‌സ്, ഇടപ്പള്ളി സൗത്തില്‍ ഭാര്യയുടെ കൂടി പേരിലുള്ള 1.35 കോടി വിലമതിക്കുന്ന 5 സെന്റ് വീടുമുണ്ട്. ഇടുക്കി ചിന്നക്കനാലില്‍ 3.5 കോടി രൂപയ്ക്ക് വാങ്ങിയ കെട്ടിടം ഉള്‍പ്പെടെയുള്ള വസ്തുവിന്റെ പകുതി ഷെയര്‍ ഉണ്ട്. കട്ടപ്പനയില്‍ 4.5 ഹെക്ടര്‍ സ്ഥലത്ത് ലീസ് ഇനത്തിലുള്ള ബാധ്യതയായി 25 ലക്ഷം രൂപയുണ്ട്. 200 പവന്‍ സ്വര്‍ണം, 16.74 ലക്ഷത്തിന്റെ എല്‍ഐസി പോളിസി, ഒന്നര ലക്ഷത്തിന്റെ മാരുതി കാര്‍ എന്നിവയാണ് ഭാര്യയുടെ പേരിലുള്ളത്.
