കൊച്ചി: സ്വർണ വില ഈ മാസത്തെ ഏറ്റവും കുറഞ്ഞ നിരക്കിലേക്ക് ഇടിഞ്ഞു. ഒരു പവൻ സ്വർണത്തിന് 44,000 രൂപയാണ് വില. ഒരു ഗ്രാമിന് 5,500 രൂപയും. രാജ്യാന്തര വിപണിയിൽ ട്രോയ് ഔൺസിന് 1,927.37 ഡോളറിലാണ് വില. സെപ്റ്റംബർ ഒന്നിന് പവന് 44,040 രൂപയായിരുന്നു വില. ഈ മാസം ഇതുവരെ പവന് 40 രൂപയുടെ വർധന മാത്രം.
ഇന്ത്യയിലെ വിവിധ നഗരങ്ങളിൽ 10 ഗ്രാം 24 കാരറ്റ് സ്വർണ്ണത്തിന് ഏകദേശം 60,000 രൂപയാണ് വില. 22 കാരറ്റ് സ്വർണ്ണത്തിന് 55,150 രൂപയും. വെള്ളി കിലോഗ്രാമിന് 76,200 രൂപയിലേക്കെത്തി. ഡൽഹിയിൽ 22 കാരറ്റ് സ്വർണത്തിന് 10 ഗ്രാമിന് 55,300 രൂപയാണ് വില. 24 കാരറ്റിന് 60,310 രൂപയും. അഹമ്മദാബാദിൽ 22 കാരറ്റിൻെറ 10 ഗ്രാം സ്വർണത്തിന് 55,200 രൂപയും 24 കാരറ്റിന് 60,210 രൂപയുമാണ് വില.
രാജ്യാന്തര വിപണിയിലെ സ്വർണ ഡിമാൻഡ്, വിവിധ രാജ്യങ്ങളിലെ കറൻസി മൂല്യം, നിലവിലെ പലിശ നിരക്കുകൾ, ഓരോ രാജ്യത്തെയും, സംസ്ഥാനത്തെയും നികുതികൾ എന്നിവയെല്ലാം വിവിധ ഇടങ്ങളിൽ സ്വർണ വിലയിലെ ഏറ്റക്കുറച്ചിലുകൾക്ക് കാരണമാകും.
യുഎസിലെ ദുർബലമായ സാമ്പത്തിക ഡാറ്റയെത്തുടർന്ന് ഡോളർ സൂചികയും ട്രഷറി വരുമാനും ഇടിഞ്ഞതാണ് കഴിഞ്ഞ ദിവസങ്ങളിൽ സ്വർണത്തിന് കരുത്തേകിയത്. സാമ്പത്തിക മേഖലയിലെ അനിശ്ചിതത്വവും പലിശനിരക്കിലെ കുറവുകളും സ്വർണവിലയ്ക്ക് അനുകൂലമായി മാറിയിരുന്നു .എന്നാൽ ഡോളർ വീണ്ടും ശക്തമായത് സ്വർണ്ണത്തിന് മങ്ങലേൽപ്പിച്ചു.
യുഎസ് പലിശനിരക്ക് കൂടുതൽ വർധിപ്പിക്കുമെന്ന ആശങ്കകൾക്ക് അയവ് വന്നതോടെ അന്താരാഷ്ട്ര വിപണിയിൽ കഴിഞ്ഞ ആഴ്ച സ്വർണ വില മൂന്നാഴ്ചത്തെ ഏറ്റവും ഉയർന്ന നിരക്കിൽ എത്തിയിരുന്നു.
വെള്ളി വില കുറഞ്ഞു. ഒരു ഗ്രാം വെള്ളിക്ക് 78.50 രൂപയാണ് വില. എട്ട് ഗ്രാം വെള്ളിക്ക് 628 രൂപയും ഒരു കിലോഗ്രാം വെള്ളിക്ക് 78,500 രൂപയാണ് വില. ഇന്നലെ ഒരു കിലോഗ്രാം വെള്ളിക്ക് 79,000 രൂപയായിരുന്നു വില.
