അടിച്ച് പൂസായി ഇരുചക്ര വാഹനത്തില്‍ സഞ്ചരിച്ച മൂന്ന് യുവതികള്‍ റോഡില്‍ വീണു; കസ്റ്റഡിയിലെടുക്കാന്‍ വന്ന പോലീസിന് നേരെ തട്ടിക്കയറി, പിന്നീട് സംഭവിച്ചത്

കാസര്‍കോട്: മദ്യലഹരിയില്‍ ഇരുചക്രവാഹനത്തില്‍ സഞ്ചരിച്ച മൂന്ന് യുവതികള്‍ റോഡില്‍ വീണു. അപകടത്തില്‍ പരിക്കേറ്റ ഇവരെ രക്ഷിക്കാനെത്തിയപ്പോഴാണ് മൂവരും മദ്യപിച്ചിട്ടുണ്ടെന്ന് കണ്ടെത്തിയത്. പീന്നീട് നാട്ടുകാര്‍ ഇവരെ പിടികൂടി പോലീസിലേല്‍പ്പിച്ചു. വ്യാഴാഴ്ച കരിന്തളം ബാങ്കിനുമുന്നിലാണ് സംഭവം നടന്നത്. ആദ്യം നീലേശ്വരം പോലീസ് സ്ഥലത്തെത്തി ഇവരെ കസ്റ്റഡിയിലെടുക്കാന്‍ ശ്രമിച്ചെങ്കിലും വഴങ്ങിയില്ല.

പോലീസ് വാഹനത്തിലേക്ക് കയറാന്‍പോലുമാവാതെ കുഴഞ്ഞ ഇവരെ ബലംപ്രയോഗിച്ച് കയറ്റാന്‍ ശ്രമിച്ചപ്പോള്‍ എതിര്‍ക്കുകയും വനിതാ പോലീസ് എത്തിയാലേ കസ്റ്റഡിയിലെടുക്കാന്‍ കഴിയൂ എന്ന് വാശിപിടിക്കുകയും ചെയ്തു. യുവതികളിലൊരാള്‍ റോഡില്‍ ഛര്‍ദിക്കുകയും ചെയ്തു. പിന്നീട് വനിതാ പോലീസ് എത്തിയാണ് ഇവരെ സ്റ്റേഷനിലേക്ക് കൊണ്ടുപോയത്. ഇവര്‍ക്കെതിരേ പോലീസ് കേസെടുത്തു.