Pinarayi vijayan 🎤‘വിരട്ടാമെന്ന് വിചാരമുണ്ടെങ്കിൽ അത് ഇങ്ങോട്ടു വേണ്ട; എന്തും പറയാമെന്നു വച്ചാൽ നടക്കില്ല’ വിമർശകർക്കെതിരെ ആഞ്ഞടിച്ച് മുഖ്യമന്ത്രി

കോട്ടയം: ഏതു തരത്തിലുള്ള പിപ്പിടി കാട്ടിയാലും ഇങ്ങോട്ട് ഏശില്ലെന്നു മുഖ്യമന്ത്രി പിണറായി വിജയൻ. കോട്ടയത്ത് കെജിഒഎ സംസ്ഥാന സമ്മേളനത്തിലെ പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഇതൊക്കെ കണ്ട് അങ്ങ് ഇളകിക്കളയും എന്നു വിചാരിച്ചാൽ അതിനു വേറെ ആളെ നോക്കണം. ജനങ്ങളെ പൂർണ വിശ്വാസമുണ്ട്. നാടിന്റെ സംസ്കാരത്തിന് എതിരായി ലൈസൻസില്ലാതെ എന്തും പറയാമെന്നു വച്ചാൽ നടക്കില്ലെന്നു കഴിഞ്ഞ ദിവസങ്ങളിലെ നടപടികൾ വഴി മനസ്സിലാക്കണമെന്നും മുഖ്യമന്ത്രി പറഞ്ഞു. എന്തും പറയാമെന്ന അവസ്ഥയാണ് രാജ്യത്ത്. വിരട്ടാമെന്ന് വിചാരമുണ്ടെങ്കിൽ അത് ഇങ്ങോട്ടു വേണ്ട.

2021ലെ തിരഞ്ഞെടുപ്പിൽ കേന്ദ്ര ഏജൻസികളും ഇവിടെ ഭരണം കിട്ടുമെന്നു പ്രതീക്ഷിച്ചവരും ഒന്നിച്ചിറങ്ങി. അമ്മാതിരി കഥകളാണ് പ്രചരിപ്പിച്ചത്. അതു പ്രചരിപ്പിക്കാൻ നല്ലൊരു ഭാഗം പത്ര, ദൃശ്യമാധ്യമങ്ങൾ ഒപ്പം നിന്നു. എൽഡിഎഫ് തീർന്നു എന്നാണ് പ്രചരിപ്പിച്ചവർ കരുതിയത്. കടലാസും പേനയും എടുത്ത് അടുത്ത മന്ത്രിസഭയിലെ അംഗങ്ങളുടെ പട്ടികയുമായി ഇറങ്ങി. ഇത് ആരോടാണ് പറഞ്ഞത്. കേരളത്തിലെ ജനങ്ങളോട്. എല്ലാ ഘട്ടവും പിന്നിട്ടു വന്ന ജനങ്ങൾ എൽഡിഎഫിന് അനുകൂലമായി നിന്നു. മെച്ചപ്പെട്ട തുടർഭരണമായിരുന്നു നാടിന്റെ ആവശ്യം. രാജ്യ താൽപര്യത്തിന് എതിരായ ഒന്നിനു മുന്നിലും കീഴടങ്ങില്ല.

ചില മാധ്യമങ്ങൾ എടുത്ത് നോക്കിയാൽ എത്ര ശതമാനമാണ് ചില പ്രത്യേക വാർത്തകൾക്കായി മാറ്റി വച്ചിരിക്കുന്നത്. ജനങ്ങളെ ആകെ മായാവലയത്തിലാക്കി എൽഡിഎഫ് സർക്കാരിനെ വലിയ പുച്ഛത്തോടെ നോക്കുന്ന അവസ്ഥയുണ്ടാക്കാം എന്നാണ് ചിന്ത. സാധാരണ ഗതിയിലുണ്ടാകേണ്ട വിശ്വാസ്യതയ്ക്ക് ചേരുന്നതാണോ എന്ന് മാധ്യമങ്ങൾ പരിശോധിക്കണം. അത് തിരുത്താൻ ആരും വരില്ല. സ്വയം തിരുത്തണമെന്നും മുഖ്യമന്ത്രി പറഞ്ഞു.

മുഖ്യമന്ത്രിയുടെ വരവ് കണക്കിലെടുത്ത് നഗരത്തിൽ വലിയ സുരക്ഷാ ക്രമീകരണങ്ങളാണ് ഏർപ്പെടുത്തിയത്. സമ്മേളന വേദിയായ മാമ്മൻ മാപ്പിളാ ഹാളിലേക്കുള്ള വഴിയായ ദേശീയപാത 183 നാലു മണിക്കൂർ പൊലീസ് പൂർണമായും ബാരിക്കേഡ് വച്ച് അടച്ചു കെട്ടി. മാമ്മൻ മാപ്പിളാ ഹാളിന്ന എതിർവശത്തുള്ള ജില്ലാ ജനറൽ ആശുപത്രിയിലേക്കുള്ള രോഗികൾ അടക്കം ബുദ്ധിമുട്ടി.

കനത്ത സുരക്ഷ ഒരുക്കിയെങ്കിലും മുഖ്യമന്ത്രിക്ക് നേരെ യുവമോർച്ച, യൂത്ത് കോൺഗ്രസ് പ്രതിഷേധം. മണിപ്പുഴയിൽ വച്ചാണ് യുവമോർച്ച കരിങ്കൊടി കാട്ടിയത്. സമ്മേളനത്തിനു ശേഷം മടങ്ങുന്നതിനിടെ നാഗമ്പടത്ത് വച്ച് യൂത്ത് കോൺഗ്രസും കരിങ്കൊടി കാട്ടി. യൂത്ത് കോൺഗ്രസ് പ്രവർത്തകരെ കാണാനെത്തിയ ഡിസിസി പ്രസിഡന്റ് അടക്കമുള്ളവരെ തടഞ്ഞതിൽ പ്രതിഷേധിച്ച് ഈസ്റ്റ് പൊലീസ് സ്റ്റേഷനു മുന്നിൽ സംഘർഷമുണ്ടായി.