Raksha raj santhwanam : ‘സാന്ത്വന’ത്തിലെ ‘അപ്പു’ വിവാഹിതയാകുന്നു, രക്ഷാ രാജിന്റെ പ്രീ വെഡ്ഡിംഗ് ഷൂട്ട്
കൊച്ചി:മലയാളി മിനിസ്‌ക്രീന്‍ പ്രേക്ഷകരുടെ പ്രിയങ്കരിയായ ‘അപ്പു’ വിവാഹിതയാകാനുള്ള ഒരുക്കത്തിലാണ്. ‘സാന്ത്വനം’ എന്ന പരമ്പരയിലെ ‘അപര്‍ണ്ണ എന്ന ‘അപ്പുവാ’യി സ്‌ക്രീനിലെത്തുന്ന രക്ഷാ രാജിന്റെ പ്രീ വെഡ്ഡിംഗ് ഷൂട്ടാണ് ഇപ്പോള്‍ സോഷ്യല്‍മീഡിയയില്‍ ചലനം സൃഷ്‍ടിക്കുന്നത്. മലയാളി പ്രേക്ഷകര്‍ക്ക് പ്രിയങ്കരമായ പരമ്പരയാണ് ‘സാന്ത്വനം’. ഒരു കൂട്ടുകുടുംബത്തിലെ രസകരമായ മുഹൂര്‍ത്തങ്ങളെ മനോഹരമായി ഒപ്പിയെടുത്ത്, സഹോദരബന്ധത്തിന്റേയും, പ്രണയത്തിന്റേയും മേമ്പൊടിയോടെ പ്രേക്ഷകരിലേക്കെത്തിക്കുന്നു എന്നതാണ് പരമ്പരയുടെ വിജയകാരണങ്ങളിലൊന്ന്. ചുരുക്കം എപ്പിസോഡുകള്‍ കൊണ്ടുതന്നെ പരമ്പരയൊന്നാകെ പ്രേക്ഷകര്‍ ഇരുകയ്യും നീട്ടി സ്വീകരിക്കുകയായിരുന്നു.
‘സാന്ത്വന’ത്തിലെ മിക്കവാറും താരങ്ങളൊക്കെ സോഷ്യല്‍ മീഡിയയില്‍ സദാ ആക്ടീവാണ്. പരമ്പരയിലെ കഥാപാത്രങ്ങളെല്ലാം പോപ്പുലറായതോടെ കഥാപാത്രങ്ങള്‍ക്കും കഥാപാത്രങ്ങളായി സ്‌ക്രീനിലെത്തുന്നവര്‍ക്കുമെല്ലാം നിറയെ ഫാന്‍ പേജുകളും സോഷ്യല്‍ മീഡിയയിലുണ്ട്. സാന്ത്വനത്തിലെ തന്ത്രപ്രധാനമായ വേഷം കൈകാര്യം ചെയ്യുന്ന താരമാണ് രക്ഷാ രാജ്. നമുക്ക് പാര്‍ക്കുവാന്‍ മുന്തിരിത്തോപ്പുകള്‍ എന്ന പരമ്പരയിലൂടെ മലയാളിക്ക് പ്രിയങ്കരിയായ ശേഷമാണ് രക്ഷ സാന്ത്വനത്തിലേക്ക് എത്തുന്നത്. എന്നാല്‍ രക്ഷയുടെ കരിയര്‍ ബെസ്റ്റ് അഭിനയവും, പരമ്പരയുടെ പ്രേക്ഷകപ്രിയവും ‘അപര്‍ണ്ണ’ എന്ന കഥാപാത്രത്തെ മലയാളിക്ക് ഏറെ പ്രിയങ്കരിയാക്കുകയായിരുന്നു.
കോഴിക്കോട് സ്വദേശിയായ രക്ഷയുടെ, അഭിനയത്തിലേക്കുള്ള അരങ്ങേറ്റം കമര്‍ക്കാറ്റ് എന്ന തമിഴ് ചിത്രത്തിലൂടെയായിരുന്നു. പിന്നീട് മലയാളം തമിഴ് ചിത്രങ്ങളുടെ ഭാഗമായ രക്ഷയെ മലയാളി അടുത്തറിയുന്നത്, ‘നമുക്ക് പാര്‍ക്കാന്‍ മുന്തിരിത്തോപ്പുകള്‍’ എന്ന പരമ്പരയിലെ ‘സോഫി’ എന്ന കഥാപാത്രമായാണ്. ‘നമുക്ക് പാര്‍ക്കാന്‍ മുന്തിരിത്തോപ്പുകള്‍’ക്ക് ശേഷമാണ് രക്ഷ, ‘അപര്‍ണ തമ്പി’ എന്ന ‘അപ്പുവാ’യി സാന്ത്വനം പരമ്പരയിലേക്കെത്തുന്നത്. കഴിഞ്ഞദിവസമാണ് തന്റെ സേവ് ദ ഡേറ്റ് ചിത്രങ്ങളും, വീഡിയോയും രക്ഷ സോഷ്യല്‍മീഡിയയില്‍ പങ്കുവച്ചത്. കോഴിക്കോട് സ്വദേശിയായ അര്‍ക്കജാണ് രക്ഷയുടെ വരന്‍. ബാംഗ്ലൂര്‍ ബേസ്ഡ് സോഫ്‌റ്റ്വെയര്‍ കമ്പനിയിലെ ഐ.ടി പ്രൊഫഷനാണ് അര്‍ക്കജ്.
പങ്കുവച്ച സേവ് ദ ഡേറ്റ് ചിത്രങ്ങളോടൊപ്പം രക്ഷ കുറിച്ച വാക്കുകളും ആരാധകര്‍ക്കിടയില്‍ ചര്‍ച്ചയാകുന്നുണ്ട്. ‘ഞാന്‍ നിന്നോട് പ്രണയത്തിലാവുകയായിരുന്നില്ല. തുറന്ന മിഴികളോടെ, മുന്നോട്ടുള്ള പാതയില്‍ ഓരോ ചുവടും വച്ചുകൊണ്ട് ഞാന്‍ നിന്നിലേക്ക് നടക്കുകയായിരുന്നു. ഞാന്‍ ആചാരങ്ങളിലും വിധിയിലും വിശ്വസിക്കുന്നുണ്ട്. എന്നാല്‍ നമ്മള്‍ തിരഞ്ഞെടുത്ത കാര്യങ്ങള്‍ പരിപൂര്‍ണ്ണമായി ചെയ്യുന്നതിലും ഞാന്‍ വിശ്വസിക്കുന്നു. ഇനിയുള്ള നൂറ് ജന്മങ്ങളിലും നൂറ് ലോകങ്ങളിലും നിന്നെ ഞാന്‍ കണ്ടെത്തും.’ എന്നാണ് ചിത്രത്തോടൊപ്പം രക്ഷ കുറിച്ചിരിക്കുന്നത്.
