![](https://breakingkerala.com/wp-content/uploads/2021/06/lakshadweep.jpg)
കവരത്തി: ലക്ഷദ്വീപില് വീണ്ടും വിവാദ ഉത്തരവ്. മീന് പിടിക്കാന് പോകുന്ന ഓരോ ബോട്ടിലും ഒരു സര്ക്കാര് ഉദ്യോഗസ്ഥന് വേണമെന്നാണ് പുതിയ ചട്ടം. ബോട്ടില് സിസിടിവി സ്ഥാപിക്കണമെന്നും ഉത്തരവില് പറയുന്നു. ഇന്നലെയാണ് ഉത്തരവിറങ്ങിയത്. വിവാദ ഉത്തരവിനെതിരെ പ്രതിഷേധവുമായി ലക്ഷദ്വീപ് എം പി മുഹമ്മദ് ഫൈസല് രംഗത്തെത്തിയിട്ടുണ്ട്.
ലക്ഷദ്വീപില് നടപ്പാക്കുന്ന ഭരണപരിഷ്കാരങ്ങളുടെ ഭാഗമായാണ് പുതിയ ഉത്തരവ്. ലക്ഷദ്വീപിലെ മുന് അഡ്മിനിസ്ട്രേറ്ററായിരുന്ന ദിനേശ്വര് ശര്മ്മ ശ്വാസകോശ രോഗത്തെ തുടര്ന്ന് മരണപ്പെട്ടതോടെയാണ് കഴിഞ്ഞ ഡിസംബറില് ഗുജറാത്ത് മുന് ആഭ്യന്തരമന്ത്രി പ്രഫുല് പട്ടേലിനെ പ്രധാനമന്ത്രി ലക്ഷദ്വീപിന്റെ അഡ്മിനിസ്ട്രേറ്റര് ചുമതല ഏല്പ്പിക്കുന്നത്.
ഇതിന് പിന്നാലെയാണ് ബീഫ് നിരോധനമടക്കമുള്ള നിയമങ്ങള് കൊണ്ടുവരുന്നത്. ദ്വീപിലെ സര്ക്കാര് ഓഫിസുകളില് ജോലി ചെയ്യുന്ന താല്ക്കാലിക ജീവനക്കാരെ പിരിച്ചുവിടല്, ഗോവധം നിരോധിക്കല്, സ്കൂളുകളില് മാംസഭക്ഷണം നിരോധനം, ഗുണ്ടാ ആക്ട് നടപ്പാക്കല് തുടങ്ങി നിരവധി ജനവിരുദ്ധ ഉത്തരവുകളാണ് നടപ്പിലാക്കിയത്. ഇതിനെതിരെ കേരളമുള്പ്പെടെ വിവിധ സംസ്ഥാനങ്ങള് രംഗത്തെത്തിയിരുന്നു. ഇതിന്റെ തുടര്ച്ചയെന്നോണമാണ് പുതിയ നിയമവും.