വഡോദര: കാണാതായ വയോധികയുടെ മൃതദേഹം കുടിവെള്ള ടാങ്കിൽ കണ്ടെത്തിയ സംഭവത്തിൽ ദുരൂഹത. ഗുജറാത്തിലെ വഡോദരയിലാണ് സംഭവം. കാണാതായി 10 ദിവസത്തിന് ശേഷമാണ് 95കാരിയെ തറനിരപ്പിന് താഴെയുള്ള കുടിവെള്ള ടാങ്കിൽ അഴുകിയ നിലയിൽ കണ്ടെത്തിയത്. ഉജ്ജം പർമാർ എന്ന 95കാരിയാണ് മരിച്ചത്. ഏതാനും ദിവസങ്ങളായി കുടിവെള്ളത്തിന് അഴുകിയ മണം അനുഭവപ്പെട്ടതോടെയാണ് ടാങ്ക് തുറന്ന് പരിശോധിച്ചത്. ഈ സമയത്താണ് മൃതദേഹം കണ്ടെത്തിയത്.
വഡോദരയിലെ വീട്ടിൽ നിന്ന് 21 ഡിസംബർ 2024നാണ് 95കാരിയെ കാണാതായത്. തുടർന്ന് വീട്ടുകാർ പൊലീസിൽ പരാതി നൽകുകയായിരുന്നു. പൊലീസ് കേസ് എടുത്ത് അന്വേഷണം നടത്തി വരുന്നതിനിടയിലാണ് കുടിവെള്ള ടാങ്കിൽ നിന്ന് മൃതദേഹം കണ്ടെത്തിയത്. ഏതാനും ദിവസങ്ങളായി വെള്ളത്തിന്റെ മണത്തിൽ വ്യത്യാസം വന്നതോടെയാണ് വീട്ടുകാർ ടാങ്ക് കഴുകാനായി തൊഴിലാളികളെ വിളിച്ചത്.
അഗ്നിരക്ഷാ സേനയുടെ സഹായത്തോടെയാണ് 95കാരിയുടെ മൃതദേഹം പൊലീസ് പുറത്തെടുത്തത്. മൃതദേഹം പോസ്റ്റ്മോർട്ടത്തിന് വിധേമാക്കുമെന്ന് പൊലീസ് വിശദമാക്കി. വീടിന്റെ പിൻഭാഗത്തായി തറനിരപ്പിന് താഴെയായാണ് ടാങ്കുള്ളത്. അപൂർവ്വമായി മാത്രം തുറക്കാറുള്ള ടാങ്കിനുള്ളിൽ വയോധികയുടെ മൃതദേഹം കണ്ടെത്തിയതിൽ ദുരൂഹത നിലനിൽക്കുകയാണ്. എന്നാൽ സംഭവത്തിൽ വിശദമായ അന്വേഷണം ഉണ്ടാകുമെന്ന് പൊലീസ് വ്യക്തമാക്കി.
അതേസമയം വീട്ടുകാരുടെ പരാതിയിൽ മേഖലയിലെ സിസിടിവി ദൃശ്യങ്ങൾ കേന്ദ്രീകരിച്ച് പൊലീസ് അന്വേഷണം നടത്തിയെങ്കിലും അസ്വഭാവികമായൊന്നും കണ്ടെത്താനായില്ല. 8 അടി ആഴവും 15 അടി വീതിയുമുള്ള ടാങ്കിൽ വയോധിക എങ്ങനെ എത്തിയതെന്ന് ഇനിയും വ്യക്തമായിട്ടില്ല. സംഭവത്തിൽ പൊലീസ് അന്വേഷണം തുടരുകയാണ്.
