തൃശൂര്‍: ഭാര്യയ്‌ക്കൊപ്പം കാറില്‍ സഞ്ചരിക്കുന്നതിനിടെ മുഖം മൂടി ധരിച്ചെത്തിയ സംഘം തട്ടിക്കൊണ്ടുപോയ സംവിധായകന്‍ നിഷാദ് ഹസനെ തൃശൂര്‍ കൊടകരയില്‍ നിന്ന് കണ്ടെത്തി. ഇയാള്‍ ഇപ്പോള്‍ ആശുപത്രിയില്‍ ചികിത്സയിലാണെന്ന് പോലീസ് അറിയിച്ചു. അതേസമയം നിഷാദ് തട്ടിക്കൊണ്ടുപോകപ്പെട്ടു എന്ന പരാതിയിലെ നിജസ്ഥിതി പോലീസ് അന്വേഷിക്കുകയാണ്.
കഴിഞ്ഞ ദിവസമാണ് തൃശൂര്‍ ജില്ലയിലെ പാവറട്ടിയില്‍ വെച്ച് നിഷാദ് ഹസനെ മുഖംമൂടി ധരിച്ച ഒരു സംഘം ആളുകള്‍ ചേര്‍ന്ന് തട്ടിക്കൊണ്ടുപോയത്. ഈ സംഘം വാഹനം തടയുകയും നിഷാദിനെ ബലം പ്രയോഗിച്ചു കൊണ്ടുപോകുകയുമായിരുന്നു എന്നാണു ഭാര്യ പോലീസില്‍ നല്‍കിയ പരാതിയില്‍ പറയുന്നത്. ഇതിനിടയില്‍ അജ്ഞാത സംഘവുമായി ഉണ്ടായ സംഘര്‍ഷത്തില്‍ നിഷാദ് ഹസന്റെ ഭാര്യയ്ക്ക് മര്‍ദ്ദനമേറ്റു.
അതിനെ തുടര്‍ന്ന് ഇവര്‍ തൃശൂരിലെ സ്വകാര്യ ആശുപത്രിയില്‍ ചികിത്സയിലാണ്.
‘വിപ്ലവം ജയിക്കാനുള്ളതാണ്’ എന്ന സിനിമയുടെ സംവിധായകനാണ് നിഷാദ് ഹസന്‍. ഈ സിനിമയുടെ മുന്‍ നിര്‍മ്മാതാവ് സി ആര്‍ രണ ദേവിനെയാണ് സംശയമെന്ന് ഭാര്യ പ്രതീക്ഷ പറഞ്ഞതിനെ തുടര്‍ന്ന് പേരാമംഗലം പോലീസ് അന്വേഷണം തുടരുകയാണ്.
