തിരുവനന്തപുരം:നടനും അതുല്യകലാകാരനുമായ നെടുമുടി വേണു (73) അന്തരിച്ചു. ദേഹാസ്വാസ്ഥ്യത്തെ തുടര്ന്ന് തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം. ഞായറാഴ്ച രാവിലെയാണ് തീവ്രപരിചരണ വിഭാഗത്തില് അദ്ദേഹത്തെ പ്രവേശിപ്പിച്ചിരുന്നത്. നേരത്തേ കോവിഡ് ബാധിച്ചിരുന്നു.
നായകനായും സഹനടനായും വില്ലനായും സ്വഭാവ നടനായും ഹാസ്യനടനായുമെല്ലാം അദ്ദേഹം അനശ്വരമാക്കിയ കഥാപാത്രങ്ങള് എപ്പോഴും നമ്മുടെ മനസ്സില് തങ്ങിനില്ക്കുമെന്ന് തീര്ച്ച. അരവിന്ദന്റെ തമ്ബില് അഭിനയിക്കാന് എത്തിയ വേണുഗോപാലില് നിന്ന് അഭിനയകലയുടെ കുലപതിയായി മാറിയ നെടുമുടി വേണുവിലേക്കുളള പരിണാമ പൂര്ത്തീകരണത്തിന്റെ ദശകങ്ങള്. മലയാളിപ്രേക്ഷകര് നൂറില് നൂറ് മാര്ക്ക് നല്കിയ നടനാണ് നെടുമുടി.
ആലപ്പുഴ ജില്ലയിലെ നെടുമുടിയില് പി കെ കേശവന്പിള്ളയുടെയും കുഞ്ഞിക്കുട്ടിയമ്മയുടെയും മകനായി 1948 മെയ് 22നാണ് നെടുമുടി വേണു ജനിച്ചത്. നാടകരംഗത്ത് സജീവമായിരിക്കെയാണ് നെടുമുടി സിനിമയിലെത്തുന്നത്. 1978ല് അരവിന്ദന് സംവിധാനം ചെയ്ത തമ്ബ് എന്ന ചിത്രത്തിലൂടെയായിരുന്നു അരങ്ങേറ്റം. ഭരതന്റെ ആരവം, പത്മരാജന്റെ ഒരിടത്തൊരു ഫയല്വാന് എന്ന ചിത്രങ്ങളിലെ നെടുമുടിയുടെ കഥാപാത്രങ്ങള് ശ്രദ്ധേയമായി. വൈകാതെ മലയാളത്തിലെ തിരക്കേറിയ സഹനടന്മാരില് ഒരാളായി മാറി. അഭിനയവൈദഗ്ധ്യവും സംഭാഷണ അവതരണത്തിലെ വ്യത്യസ്തതയും നെടുമുടിയുടെ കഥാപാത്രങ്ങള്ക്ക് കരുത്തേകി.
വിദ്യാഭ്യാസ കാലത്ത് സാംസ്കാരിക പ്രവര്ത്തനങ്ങളില് സജീവമായിരുന്നു. ആലപ്പുഴ എസ് ഡി കോളേജില് നിന്ന് ബിരുദമെടുത്തശേഷം കലാകൗമുദിയില് പത്രപ്രവര്ത്തകനായും ആലപ്പുഴയില് പാരലല് കോളേജ് അധ്യാപകനായും പ്രവര്ത്തിച്ചു. തിരുവനന്തപുരത്തേക്ക് താമസം മാറ്റിയതോടെ അരവിന്ദന്, പത്മരാജന്, ഭരത് ഗോപി തുടങ്ങിയവരുമായി സൗഹൃദത്തിലായി.
നായകനും വില്ലനും സ്വഭാവനടനുമൊക്കെയായി തിരശ്ശീലയില് നിറഞ്ഞ വേണു കാരക്ടര് റോളുകളും തമാശ വേഷങ്ങളും ഉള്പ്പെടെയെല്ലാം ഗംഭീരമായി അവതരിപ്പിച്ചു. അനന്യമായ അഭിനയ ശൈലിയും പ്രതിഭയും കൊണ്ട് ഇന്ത്യന് സിനിമയിലെ തന്നെ എണ്ണംപറഞ്ഞ നടന്മാരിലൊരാളാകാന് വേണുവിനു കഴിഞ്ഞു. ദേശീയ ചലച്ചിത്ര പുരസ്കാരം മൂന്നു വട്ടവും സംസ്ഥാന ചലച്ചിത്ര പുരസ്കാരം ആറുവട്ടവും ലഭിച്ചു. ഏതാനും ചിത്രങ്ങളുടെ രചനയും നിര്വഹിച്ചിട്ടുണ്ട്. ഭാര്യ: ടി.ആര്. സുശീല. മക്കള്: ഉണ്ണി ഗോപാല്, കണ്ണന് ഗോപാല്.
വിടപറയും മുന്പേ, തേനും വയമ്ബും, പാളങ്ങള്, കള്ളന് പവിത്രന്, ആലോലം, അപ്പുണ്ണി, ഹിസ് ഹൈനസ് അബ്ദുള്ള, ഭരതം എന്നിങ്ങനെ വ്യത്യസ്ത സിനിമകളില് മലയാളികളും മലയാളസിനിമയും ഉള്ളിടത്തോളം കാലം നിലനില്ക്കുന്ന ശക്തമായ കഥാപാത്രങ്ങളെ അദ്ദേഹം അവതരിപ്പിച്ചു. 500-ല് അധികം സിനിമകളില് നെടുമുടിവേണു അഭിനയിച്ചിട്ടുണ്ട്. കാറ്റത്തെ കിളിക്കൂട്,ഒരു കഥ ഒരു നുണക്കഥ,സവിധം, തുടങ്ങി എട്ടു ചിത്രങ്ങള്ക്ക് കഥയെഴുതുകയും, പൂരം എന്ന ചലച്ചിത്രം സംവിധാനം ചെയ്യുകയും ചെയ്തു.1991ല് ഹിസ് ഹൈനസ് അബ്ദുള്ള എന്ന ചിത്രത്തിന് മികച്ച സഹനടനുള്ള ദേശീയ അവാര്ഡ് കരസ്ഥമാക്കി. 2004 ല് ദേശീയ ജൂറിയുടെ പ്രത്യേക പരാമര്ശത്തിനും അര്ഹനായി.1981,1987,2003 എന്ന വര്ഷങ്ങളില് മികച്ച നടനുള്ള സംസ്ഥാന അവാര്ഡും കരസ്ഥമാക്കി. മലയാളം തമിഴ് സിനിമകളിലും അദ്ദേഹം അഭിനയിച്ചിട്ടുണ്ട്.