തിരുവനന്തപുരം: ജോസ് കെ മാണിയെ സഹകരിപ്പിക്കണമെന്ന് പരോക്ഷമായി സൂചന നല്‍കി എം.പിയും കോണ്‍ഗ്രസ് നേതാവുമായ കെ മുരളീധരന്‍. കഴിഞ്ഞ ലോക്സഭ തെരഞ്ഞെടുപ്പില്‍ ആരൊക്കെ സഹകരിച്ചോ അവരെയെല്ലാം സഹകരിപ്പിക്കണമെന്ന് മുരളീധരന്‍ പറഞ്ഞു. സഹകരിക്കാന്‍ താത്പര്യമുള്ളവരെ സഹകരിപ്പിക്കണമെന്നും പിണങ്ങി നില്‍ക്കുന്നവരെ കൂടെ നിര്‍ത്തണമെന്നും കെ മുരളീധരന്‍. അതാണ് പ്രായോഗിക രാഷ്ട്രീയമെന്നും അദ്ദേഹം വ്യക്തമാക്കി.
എല്ലാ കാലത്തേക്കും ആളുകളെ മാറ്റിനിര്‍ത്തേണ്ടതില്ലെന്നും ഐക്യമെപ്പോഴും വേണമെന്നും കെ മുരളീധരന്‍ തിരുവനന്തപുരത്ത് പറഞ്ഞു. അണികളുടെ തെരഞ്ഞെടുപ്പാണ് പഞ്ചായത്തിലേത്. ജയിക്കാനുള്ള തന്ത്രങ്ങളാണ് ആവിഷ്‌കരിക്കേണ്ടത്. അണികളാണ് പാര്‍ട്ടിയുടെ അടിത്തറയെന്നും നിരാശരായാല്‍ അവര്‍ പാര്‍ട്ടിക്ക് ഒപ്പം കാണില്ലെന്നും മുരളീധരന്‍ ഓര്‍മിപ്പിച്ചു. പിന്നീട് വരിക നിയമസഭാ തെരഞ്ഞെടുപ്പാണ്.
നെഗറ്റീവുകളെ പോസിറ്റീവാക്കി എടുക്കണം, അതേസമയം പാര്‍ട്ടിയുടെ അന്തസ് കാത്തുസൂക്ഷിക്കുകയും വേണമെന്നും മുരളീധരന്‍. പാലക്കാട് ലോക്സഭാ തെരഞ്ഞെടുപ്പില്‍ സംഭവിച്ചത് അതാണ്. പ്രായോഗിക രാഷ്ട്രീയത്തിനാണ് ഇക്കാലത്ത് പ്രസക്തി. കെ കരുണാകരന്റെ 102ാം ജന്മവാര്‍ഷിക സമ്മേളനത്തിലാണ് തന്റെ അഭിപ്രായം മുരളീധരന്‍ തുറന്നുപറഞ്ഞത്. രമേശ് ചെന്നിത്തല, വിഎം സുധീരന്‍ തുടങ്ങിയ മുതിര്‍ന്ന നേതാക്കളെല്ലാം തന്നെ യോഗത്തില്‍ പങ്കെടുത്തിരുന്നു.
