അലിരാജ്പൂര്‍: ആളുകള്‍ക്കിടയിലൂടെ ബലമായി പിടിച്ചുകൊണ്ടുപോയി ഒരു കൂട്ടം യുവാക്കള്‍ പെണ്‍കുട്ടിയെ ലൈംഗികമായി പീഡിപ്പിക്കുന്ന വീഡിയോ സമൂഹ മാധ്യമങ്ങളില്‍ വൈറലാകുന്നു. ഏതാനും ദിവസങ്ങള്‍ക്ക് മുമ്ബ് അലിരാജ്പൂര്‍ ജില്ലയിലെ ബാല്‍പൂര്‍ ഗ്രാമത്തില്‍ സംഘടിപ്പിച്ച പ്രസിദ്ധമായ ഭഗോറിയ ഫെസ്റ്റിവലിനിടെ ചിത്രീകരിച്ച വീഡിയോയാണ് പുറത്തുവന്നിരിക്കുന്നത്.
മധ്യപ്രദേശിലെ ആദിവാസി മേഖലകളിലെ ജില്ലകളില്‍ ഏറ്റവും വലുതും പ്രശസ്തവുമായ വാര്‍ഷിക പരിപാടികളിലൊന്നാണ് ഭഗോറിയ.
ആള്‍ക്കൂട്ടത്തിനിടയിലൂടെ നിര്‍ത്തിയിട്ടിരിക്കുന്ന വാഹനത്തിന് പിന്നില്‍ ഒരു പെണ്‍കുട്ടി ഒളിക്കാന്‍ ശ്രമിക്കുന്നത് വീഡിയോയില്‍ കാണാം. പിന്നാലെ അതുവഴി കടന്നുപോയ സംഘത്തിലെ ഒരു യുവാവ് പെണ്‍കുട്ടിയെ ഓടിച്ചിട്ട് ലൈംഗികമായി പീഡിപ്പിക്കുകയായിരുന്നു.
തൊട്ടുപിന്നാലെ മറ്റൊരു യുവാവ് പെണ്‍കുട്ടിയെ വലിച്ചിഴയ്ക്കുകയും പിന്നീട് സംഘത്തിലെ ഓരോരുത്തരായി പീഡിപ്പിക്കുന്നതും വീഡിയോയില്‍ കാണാം. ആളുകള്‍ നോക്കിനില്‍ക്കുന്നതിനിടെയാണ് ഈ പരാക്രമങ്ങളെല്ലാം. പലരും മൊബൈല്‍ഫോണുകളില്‍ വീഡിയോ എടുക്കാന്‍ ശ്രമിക്കുന്നുമുണ്ട്. എന്നാല്‍ ആരും യുവാക്കളെ തടയുന്നതായി വീഡിയോയില്‍ കാണുന്നില്ല.
അയല്‍പക്കത്തുള്ള ധാര്‍ ജില്ലയില്‍ നിന്നുള്ള ഒരേ ഗ്രാമത്തിലുള്ളവരാണ് പെണ്‍കുട്ടിയും യുവാക്കളും. സംഭവത്തില്‍ പോലീസ് കേസെടുത്ത് അന്വേഷണം ആരംഭിച്ചതായി ജില്ലാ പൊലീസ് സൂപ്രണ്ട് (എസ്പി), മനോജ് സിംഗ് പറഞ്ഞു. പ്രതികളെ തിരിച്ചറിഞ്ഞിട്ടുണ്ടെന്നും അദ്ദേഹം കൂട്ടിച്ചേര്‍ത്തു.
