തിരുവനന്തപുരം: മുഖ്യമന്ത്രി പിണറായി വിജയന്‍ ഇനി സഞ്ചരിക്കുക കറുത്ത നിറത്തിലുള്ള ഇന്നോവ ക്രിസ്റ്റയില്‍. വെള്ള നിറത്തിലുള്ള ക്രിസ്റ്റയാണ് മുഖ്യമന്ത്രി നിലവില്‍ ഉപയോഗിക്കുന്നത്. പോലീസ് റിപ്പോര്‍ട്ടിന്റെ അടിസ്ഥാനത്തിലാണ് മുഖ്യമന്ത്രിയുടെ ഔദ്യോഗിക വാഹനത്തിന്റെ നിറം മാറ്റാന്‍ തീരുമാനിച്ചത്.
മുഖ്യമന്ത്രിക്കായി പുതുതായി വാങ്ങിയ വാഹനത്തിന്റെ നിറമാണ് മാറ്റുക. ആകെ നാലു വാഹനങ്ങളാണ് മുഖ്യമന്ത്രിക്കും അകമ്പടിക്കുമായി വാങ്ങുന്നത്. മൂന്ന് ഇന്നോവ ക്രിസ്റ്റയും ഒരു ടാറ്റ ഹാരിയറും. ഇതില്‍ ആദ്യ വാഹനം ഈയാഴ്ച കൈമാറും. ശേഷിക്കുന്നവ പിന്നീടു കൈമാറുമെന്ന് അധികൃതര്‍ പറഞ്ഞു.
മുഖ്യമന്ത്രി ഉപയോഗിക്കുന്ന വാഹനങ്ങള്‍ 4 വര്‍ഷം പഴക്കം ഉള്ളതിനാല്‍ മാറ്റണമെന്നായിരുന്നു പോലീസിന്റെ ശുപാര്‍ശ. ഇതിനായി മാസങ്ങള്‍ക്കു മുന്‍പ് 63 ലക്ഷം രൂപ അനുവദിച്ചിരുന്നു. സുരക്ഷാ കാരണങ്ങള്‍ മൂലമാണോ നിറംമാറ്റമെന്ന കാര്യം അധികൃതര്‍ വ്യക്തമാക്കിയിട്ടില്ല. പ്രധാനമന്ത്രിനരേന്ദ്രമോദി ഉപയോഗിക്കുന്ന വാഹനവും കറുത്ത നിറത്തിലുള്ളതാണ്.
