തിരുവനന്തപുരം: ബുറേവി മൂന്നാം ദിവസവും മാന്നാര്‍ കടലിടുക്കില്‍ തന്നെ തുടരുന്നു. ചുഴലിക്കാറ്റ് ന്യൂനമര്‍ദമായതോടെ കാറ്റിന്റെ വേഗത മണിക്കൂറില്‍ 30 കിമീ മുതല്‍ 40 കിമീ വരെയായി ചുരുങ്ങി.
ബുറേവിക്ക് പടിഞ്ഞാറോട്ട് പോവാന്‍ സാധിക്കാത്ത നിലയില്‍ അറബി കടലില്‍ പുതിയ ന്യൂനമര്‍ദം രൂപം കൊണ്ടു. മുകളിലായി ജെറ്റ് സ്ട്രീം പ്രതിഭാസവും രൂപപ്പെട്ടു. ബംഗാള്‍ ഉള്‍ക്കടലിലും പുതിയ ന്യൂനമര്‍ദമുണ്ടായി. രാമേശ്വരം ഭാഗത്ത് കടലിന് ആഴം കുറവായതിനാല്‍ ചുഴലിക്കാറ്റായി മാറാന്‍ വേണ്ട ഗതികോര്‍ജം കൈവരിക്കാന്‍ ബുറെവിക്കായില്ല.
സംസ്ഥാനത്ത് ഇന്നും പരക്കെ മഴ ലഭിക്കുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ പ്രവചനം. പത്തനംതിട്ട, ഇടുക്കി, എറണാകുളം, മലപ്പുറം ജില്ലകളില്‍ ഓറഞ്ച് അലേര്‍ട്ട് പ്രഖ്യാപിച്ചിട്ടുണ്ട്. കാസര്‍കോട്, കണ്ണൂര്‍ ഒഴികെയുള്ള ജില്ലകളില്‍ യെല്ലോ അലേര്‍ട്ടും പ്രഖ്യാപിച്ചു. കടലില്‍ പോവുന്നതിന് മത്സ്യ തൊഴിലാളികള്‍ക്കുള്ള വിലക്ക് തുടരും.
