കോട്ടയം: ഈരയിൽക്കടവിൽ വീടിന്റെ വൈദ്യുതി മീറ്ററിന് തീപിടിച്ചു പൊട്ടിത്തെറിച്ചു. മുൻ പിഎസ്‍സി അംഗം ഈരയിൽക്കടവ് കണിക്കത്തോട് ഗ്രേസമ്മ മാത്യുവിന്റെ വീട്ടിലെ വൈദ്യുത മീറ്ററാണ് പൊട്ടിത്തെറിച്ചത്. വൻ ശബ്ദത്തോടെ മീറ്റർ പൊട്ടിത്തെറിക്കുകയും തീയും പുകയും ഉയരുകയും ചെയ്തതോടെ നാട്ടുകാർ ഫയർ ഫോഴ്സിനെ വിവരമറിയിച്ചു. കോട്ടയം യൂണിറ്റിൽ നിന്നുള്ള ഫയർ ഫോഴ്സ് എത്തിയാണ് രക്ഷാപ്രവർത്തനം നടത്തിയത്.
ബുധനാഴ്ച ഉച്ചയ്ക്ക് 12 മണിയോടുകൂടിയായിരുന്നു സംഭവം. ഗ്രേസമ്മയും ഭർത്താവും വീട്ടിൽ ഇല്ലാതിരുന്ന സമയത്താണ് തീപിടിത്തമുണ്ടായത്. വൻ ശബ്ദത്തോടെ മീറ്റർ പൊട്ടിത്തെറിക്കുകയായിരുന്നു. ശബ്ദം കേട്ട് ഓടിയെത്തിയ അയൽവാസികളാണ് ഫയർ ഫോഴ്സിനെ വിവരമറിയിച്ചത്. ഫയർ ഫോഴ്സ് സംഘം സ്ഥലത്തെത്തിയപ്പോൾ മീറ്ററിൽനിന്ന് പുക ഉയരുകയായിരുന്നു. ഇവർ ഫയർ എക്സ്റ്റിൻഗ്യൂഷർ ഉപയോഗിച്ച് തീകെടുത്തി.
കോട്ടയം ഫയർ യൂണിറ്റിലെ അസി.സ്റ്റേഷൻ ഓഫീസർ ശിവകുമാർ , ഗ്രേഡ് അസി. സ്റ്റേഷൻ ഓഫീസർ അശോകൻ, സീനിയർ ഫയർ ആന്റ് റസ്ക്യു ഓഫീസർ കിഷോർ കുമാർ എന്നിവരുടെ നേതൃത്വത്തിലാണ് രക്ഷാപ്രവർത്തനം നടത്തിയത്.
