തിരുനെല്‍വേലി: പൂച്ചയെ കൊന്ന ശേഷം മൃതദേഹം കെട്ടിത്തൂക്കി പ്രദര്‍ശിപ്പിച്ച് ടിക്ക്‌ടോക്ക് വീഡിയോ എടുത്ത 18കാരന്‍ അറസ്റ്റില്‍. ബുധനാഴ്ചയാണ് തിരുനെല്‍വേലി പോലീസ് ഇയാളെ അറസ്റ്റ് ചെയ്തത്. മെയ് 16നാണ് ഇയാള്‍ വീഡിയോ അപ്ലോഡ് ചെയ്തത്.
വീടിന്റെ മേല്‍ക്കൂരയില്‍ കെട്ടിയിരിക്കുന്ന കയറില്‍ ഒരു പൂച്ചയുടെ മൃതദേഹം തൂങ്ങിക്കിടക്കുന്നതായിരുന്നു വീഡിയോ. ഈ മൃതദേഹത്തില്‍ പിടിച്ച് അത് ആട്ടിവിടുന്ന ഒരാളെയും വീഡിയോയില്‍ കാണാമായിരുന്നു. ഫ്രണ്ട്‌സ് എന്ന തമിഴ് സിനിമയിലെ ഒരു കോമഡി രംഗമായിരുന്നു വീഡിയോയുടെ പശ്ചാത്തലത്തില്‍ ഉണ്ടായിരുന്നത്.
വീഡിയോക്കെതിരെ സമൂഹമാധ്യമങ്ങളില്‍ കടുത്ത വിമര്‍ശനങ്ങള്‍ ഉയര്‍ന്നു. ഇയാളെ അറസ്റ്റ് ചെയ്യണമെന്ന് ആളുകള്‍ ആവശ്യപ്പെട്ടു. അറസ്റ്റ് ആവശ്യപ്പെട്ട് ഒരു ആക്ടിവിസ്റ്റ് ംപാലീസീലും പരാതി നല്‍കി. തുടര്‍ന്നായിരുന്നു അറസ്റ്റ്.
തിരുനെല്‍വേലി ടൗണില്‍ നിന്ന് 25 കിലോമീറ്റര്‍ മാറി സത്യപുരം എന്ന സ്ഥലത്ത് താമസിക്കുന്ന തങ്കരാജ് എന്നയാളാണ് ഇതെന്ന് പോലീസ് പറയുന്നു. ഇന്ത്യന്‍ ശിക്ഷാ നിയമം 429 അനുസരിച്ചാണ് ഇയാളെ അറസ്റ്റ് ചെയ്തത്. അറസ്റ്റ് ചെയ്ത് ഇയാളെ ജാമ്യത്തില്‍ വിട്ടയച്ചു.
