പെരുമ്പാവൂർ: പെരുമ്പാവൂരിലെ എൻഡിഎ സ്ഥാനാർത്ഥി ടി.പി സിന്ധുമോളെ അപായപ്പെടുത്താൻ ശ്രമം. തെരഞ്ഞെടുപ്പിന്റെ മുന്നൊരുക്കങ്ങൾ വിലയിരുത്തി മടങ്ങവേ ആളൊഴിഞ്ഞ ഭാഗത്ത് വാഹനത്തിന് നേരെ കല്ലെറിയുകയും മറ്റൊരു വാഹനത്തിൽ വന്ന് അക്രമിക്കാൻ ശ്രമിക്കുകയുമായിരുന്നു. രാത്രി പത്ത് മണിയോടെ വെങ്ങോല പഞ്ചായത്തിലെ തുരുത്തിപ്പിള്ളിയിൽ വെച്ചാണ് സംഭവം.
പോളിംഗ് സ്റ്റേഷനുകൾക്ക് സമീപം ബൂത്ത് കെട്ടുന്നത് ഉൾപ്പെടെയുളള കാര്യങ്ങൾ പ്രവർത്തകരുമായി ചർച്ച ചെയ്തു മടങ്ങുകയായിരുന്നു സിന്ധുമോൾ. വാഹനത്തിൽ ഭർത്താവും പാർട്ടി പ്രവർത്തകരും ഉണ്ടായിരുന്നു. തുരുത്തിപ്പിള്ളിയിൽ ഒരു വശത്ത് പാടം നിറഞ്ഞ ഭാഗത്ത് എത്തിയപ്പോൾ വലിയ ശബ്ദം കേട്ടു. വാഹനത്തിൽ എന്തോ പതിച്ചതായി തോന്നി. ഒപ്പമുണ്ടായിരുന്നവർ അത് പരിശോധിക്കാൻ വേണ്ടി പുറത്തിറങ്ങിയപ്പോഴാണ് ലൈറ്റുകൾ ഓഫ് ചെയ്ത് അമിതവേഗത്തിൽ എത്തിയ ഒരു കാർ സിന്ധുമോൾ സഞ്ചരിച്ച വാഹനത്തിൽ ഉരസി കടന്നുപോയത്.
ദേഹാസ്വാസ്ഥ്യം അനുഭവപ്പെട്ട സിന്ധുമോൾ ആശുപത്രിയിൽ ചികിത്സ തേടി. അക്രമം നടന്ന ഭാഗത്ത് തെരുവു വിളക്കുകളും ഉണ്ടായിരുന്നില്ല. മുൻകൂട്ടി ആസൂത്രണം ചെയ്ത് ആരോ പിന്തുടർന്ന് അപായപ്പെടുത്താൻ ശ്രമിക്കുകയായിരുന്നുവെന്ന് സിന്ധുമോൾ പറഞ്ഞു.
