കോട്ടയത്ത് വെള്ളം ചോദിച്ച് വീട്ടിലെത്തിയ നാടോടി സ്ത്രീ പിഞ്ചു കുഞ്ഞിന്റെ കഴുത്തില്‍ കത്തിവെച്ച് രണ്ടു പവന്‍ കവര്‍ന്നു
കോട്ടയം: കോട്ടയം പ്ലാശനാലില്‍ വെള്ളം ചോദിച്ചെത്തിയ നാടോടി സ്ത്രീ ഒന്നര മാസം പ്രായമായ കുഞ്ഞിന്റെ കഴുത്തില്‍ കത്തിവച്ച് രണ്ടുപവന്‍ സ്വര്‍ണം കവര്‍ന്നു. ഭിക്ഷയ്ക്കായി തെള്ളിയാമറ്റം വാഴമറ്റത്തില്‍ ബിജുവിന്റെ വീട്ടിലെത്തിയ നാടോടി സ്ത്രീ ഇയാളുടെ മകള്‍ ജയലക്ഷ്മിയുടെ കുഞ്ഞിന്റെ കഴുത്തില്‍ കത്തിവച്ചാണ് 2 പവന്‍ കവര്‍ന്നത്.
ജയലക്ഷ്മിയും സഹോദരി ശ്രീലക്ഷ്മിയും മാത്രമാണ് സംഭവസമയത്ത് വീട്ടില്‍ ഉണ്ടായിരുന്നത്. ശ്രീലക്ഷ്മി വെള്ളമെടുക്കാന്‍ വീടിനുള്ളിലേക്ക് കയറിയ സമയത്ത് വീടിനുള്ളില്‍ കയറിയ നാടോടി സ്ത്രീ ജയലക്ഷ്മിയുടെ കൈയിലിരുന്ന കുഞ്ഞിന്റെ കഴുത്തില്‍ കത്തിവയ്ക്കുകയും ആഭരണങ്ങള്‍ ഊരിനല്‍കാന്‍ ആവശ്യപ്പെടുകയുമായിരുന്നു. ഇവര്‍ ഉടന്‍ തന്നെ വീട്ടില്‍ നിന്ന് സ്ഥലം വിടുകയയും ചെയ്തു. പെട്ടെന്നുള്ള ആക്രമണത്തില്‍ സഹോദരിമാര്‍ ഭയപ്പെട്ടുപോയി.
തുടര്‍ന്ന് പിതാവ് ബിജു എത്തി പോലീസില്‍ പരാതിപ്പെടുകയായിരുന്നു. പച്ചസാരിയും ഓറഞ്ച് ബ്ലൗസുമാണ് സ്ത്രീ ധരിച്ചിരുന്നതെന്ന് ശ്രീലക്ഷ്മി പറഞ്ഞു. മൂക്കുത്തി ധരിച്ചിരുന്ന ഇവര്‍ തമിഴും മലയാളും ചേര്‍ന്ന ഭാഷയാണ് സംസാരിച്ചിരുന്നത്. പോലീസ് എത്തി അന്വേഷണം നടത്തിയെങ്കിലും സൂചനകളൊന്നും ലഭിച്ചില്ല. പ്രദേശത്തെ നിരീക്ഷണ ക്യാമറകള്‍ പരിശോധിച്ചു വരികയാണ്.
ഭിക്ഷാടനമാഫിയ സജീവമായിരിക്കുന്ന കേരളത്തില്‍ ഭിക്ഷാടനത്തിനെത്തുന്നവര്‍ പിഞ്ചുകുഞ്ഞുങ്ങളെ തട്ടിക്കൊണ്ടു പോകുന്നതും കവര്‍ച്ച നടത്തുന്നതും നിത്യസംഭവമാണ്.
