GULF NEWS🏝️🐪 സ്വകാര്യമേഖലയില്‍ സ്വദേശിവല്‍ക്കരണം നടപ്പാക്കാന്‍ ഖത്തറും; കരട് നിയമത്തിന് മന്ത്രിസഭയുടെ അംഗീകാരം

ദോഹ: സ്വകാര്യ മേഖലയിലെ തൊഴിലുകളില്‍ സ്വദേശികള്‍ക്ക് കൂടുതല്‍ അവസരങ്ങള്‍ സൃഷ്ടിക്കുകയെന്ന ലക്ഷ്യത്തോടെ ഗള്‍ഫ് രാജ്യങ്ങളില്‍ നടന്നുവരുന്ന സ്വദേശിവല്‍ക്കരണ പ്രക്രിയ ഖത്തറിലും ആരംഭിക്കുന്നു.

സൗദി, കുവൈറ്റ്, ഒമാന്‍ എന്നീ രാജ്യങ്ങളില്‍ വര്‍ഷങ്ങളായി തുടരുന്ന സ്വദേശിവല്‍ക്കരണ പ്രക്രിയ കഴിഞ്ഞ വര്‍ഷം മുതല്‍ യുഎഇയും ശക്തിപ്പെടുത്തിയിരുന്നു. ഇതിനു പിന്നാലെയാണ് ഖത്തറും സ്വകാര്യ മേഖലയില്‍ സ്വദേശി പങ്കാളിത്തം വര്‍ധിപ്പിക്കുകയെന്ന ലക്ഷ്യത്തോടെ ഖത്തറൈസേഷന്‍ പദ്ധതികള്‍ക്ക് തുടക്കം കുറിച്ചിരിക്കുന്നത്.

ഇതിന്റെ ആദ്യ പടിയായി സ്വകാര്യ മേഖലയിലെ ജോലികള്‍ ദേശസാല്‍ക്കരിക്കുന്നത് സംബന്ധിച്ച കരട് നിയമത്തിന് ഇന്നലെ ചേര്‍ന്ന മന്ത്രിസഭ അംഗീകാരം നല്‍കി. സ്വകാര്യ മേഖലയിലെ ജോലികള്‍ സ്വദേശിവല്‍ക്കരിക്കുന്നതിന് അനുവദിച്ചിട്ടുള്ള ആനുകൂല്യങ്ങള്‍, സൗകര്യങ്ങള്‍, പ്രത്യേകാവകാശങ്ങള്‍ എന്നിവ സംബന്ധിച്ച കരട് തീരുമാനത്തിനും കാബിനറ്റ് അംഗീകാരം നല്‍കി.

വിവിധ മേഖലകള്‍ക്കായുള്ള ദേശസാല്‍ക്കരണ പദ്ധതികളുടെ വെളിച്ചത്തില്‍, ഓരോ മേഖലയിലെയും ദേശസാല്‍കൃത തൊഴിലവസരങ്ങള്‍ എത്രയെന്ന കാര്യം മന്ത്രിസഭ തീരുമാനിക്കും. തൊഴില്‍ മന്ത്രി നിര്‍ദ്ദേശിച്ച പ്രകാരം, ദേശസാല്‍ക്കരണ ലക്ഷ്യങ്ങള്‍ കൈവരിക്കുന്നതിന് സ്ഥാപനങ്ങള്‍ക്കുള്ള പ്രോത്സാഹനങ്ങളും ആ സ്ഥാപനങ്ങളിലെ ഖത്തര്‍ തൊഴിലാളികള്‍ക്കുള്ള സാമ്പത്തിക ആനുകൂല്യങ്ങളും ക്യാബിനറ്റ് നിര്‍ണ്ണയിക്കും.

എല്ലാ പൗരന്മാര്‍ക്കും ജോലിയും സാമ്പത്തിക സുരക്ഷയും നല്‍കാനുള്ള ഗവണ്‍മെന്റിന്റെ ശ്രമങ്ങളുടെ ഭാഗമായി രാജ്യത്തെ തൊഴില്‍ ശക്തിയില്‍ ഖത്തരികളുടെ എണ്ണം വര്‍ധിച്ചതായി മന്ത്രിസഭാ യോഗം വിലയിരുത്തി. 2022-ല്‍ ഖത്തറിലെ പൊതു-സ്വകാര്യ മേഖലകളിലായി 7,127 തൊഴിലവസരങ്ങളാണ് ഖത്തര്‍ പൗരന്മാര്‍ക്കായി പുതുതായി സൃഷ്ടിക്കപ്പെട്ടത്.

തൊഴില്‍, സിവില്‍ സര്‍വീസ് മന്ത്രാലയവും ഗവണ്‍മെന്റ് ഡെവലപ്മെന്റ് ബ്യൂറോയും പുറത്തിറക്കിയ 2022 റിക്രൂട്ട്മെന്റ് സ്ഥിതിവിവരക്കണക്കുകള്‍ പ്രകാരം, പൊതുമേഖലയാണ് കഴിഞ്ഞ വര്‍ഷം ഖത്തരികള്‍ക്കായി ഏറ്റവും കൂടുതല്‍ തൊഴിലവസരങ്ങള്‍ സൃഷ്ടിച്ചത്. പൊതു മേഖയില്‍ 5,000-ത്തിലധികം പൗരന്മാര്‍ പൊതുമേഖലാ ജോലികളില്‍ പ്രവേശിച്ചു.

പുതുതായി ജോലിയില്‍ പ്രവേശിച്ചവരില്‍ 69 ശതമാനവും സ്ത്രീകളാണ് എന്നതാണ് ഒരു സവിശേഷത. കഴിഞ്ഞ വര്‍ഷം സ്വകാര്യമേഖലയില്‍ 1,850 ഖത്തര്‍ പൗരന്മാര്‍ക്ക് പുതുതായി തൊഴില്‍ ലഭിച്ചതായും കണക്കുകള്‍ വ്യക്തമാക്കി.

ഖത്തര്‍ ദേശീയ വിഷന്‍ 2030 ന്റെ ഏറ്റവും പ്രധാനപ്പെട്ട സ്തംഭങ്ങളിലൊന്നായ മാനവ വികസനം, എല്ലാ പൗരന്മാര്‍ക്കും അവരുടെ അഭിലാഷങ്ങള്‍ക്കും കഴിവുകള്‍ക്കും അനുസൃതമായ ഉയര്‍ന്ന നിലവാരമുള്ള തൊഴില്‍ പരിശീലന അവസരങ്ങള്‍ വിഭാവനം ചെയ്യുന്നുണ്ട്. അതോടൊപ്പം തൊഴില്‍ വിപണിയുടെ നിലവിലുള്ളതും ഭാവിയിലുള്ളതുമായ ആവശ്യങ്ങളെ അഭിസംബോധന ചെയ്യുന്ന രീതിയിലുള്ള പരിശീലന പരിപാടികളും അധികൃതര്‍ പദ്ധതിയിടുന്നു. ജോലി അന്വേഷിക്കുന്ന ഖത്തറികള്‍ക്ക് തൊഴില്‍ ലഭ്യമാക്കുന്നതിനുള്ള ഗവണ്‍മെന്റിന്റെ പദ്ധതികള്‍ സാക്ഷാത്കരിക്കുന്നതില്‍ ദേശീയ തൊഴില്‍ പ്ലാറ്റ്‌ഫോമായ കവാദറിന് നിര്‍ണായക പങ്ക് വഹിക്കാനുണ്ടെന്ന് മന്ത്രിസഭാ യോഗം വിലയിരുത്തി.

ഖത്തറി ജീവനക്കാര്‍ക്ക് ഈ പോര്‍ട്ടല്‍ വഴി പുതിയ തൊഴിലവലരങ്ങള്‍ കണ്ടെത്താന്‍ സാധിക്കും. ഭാവിയിലെ തൊഴിലിന് ആവശ്യമായ വൈദഗ്ധ്യം നേടുന്നതിന് തൊഴിലന്വേഷകരെ പ്രാപ്തരാക്കാനും സര്‍ക്കാര്‍ പദ്ധതികള്‍ ആവിഷ്‌ക്കരിച്ചിട്ടുണ്ട്. ഒരേസമയം പരമാവധി അഞ്ച് ജോലികള്‍ക്ക് അപേക്ഷിക്കാന്‍ ഖത്തരി തൊഴിലന്വേഷകര്‍ക്ക് സാധിക്കുമെന്നും അധികൃതര്‍ വ്യക്തമാക്കി.

സര്‍ക്കാര്‍ മേഖലയില്‍, പ്രൈമറി ഹെല്‍ത്ത് കെയര്‍ കോര്‍പ്പറേഷന്‍, ഔഖാഫ്, ഇസ്ലാമിക് അഫയേഴ്‌സ് മന്ത്രാലയം, ഹമദ് മെഡിക്കല്‍ കോര്‍പ്പറേഷന്‍, മുനിസിപ്പാലിറ്റി മന്ത്രാലയം, സുപ്രീം ജുഡീഷ്യറി കൗണ്‍സില്‍, ജനറല്‍ അതോറിറ്റി ഓഫ് കസ്റ്റംസ് എന്നിവിടങ്ങളിലാണ് കഴിഞ്ഞ വര്‍ഷം ഏറ്റവും കൂടുതല്‍ സ്വദേശികള്‍ ജോലിയില്‍ പ്രവേശിച്ചത്. സ്വകാര്യ മേഖലയില്‍ ജോലി ലഭിച്ച 1850 ഖത്തര്‍ പൗരന്മാരില്‍ 52 ശതമാനം പുരുഷന്‍മാരും 48 ശതമാനം സ്ത്രീകളുമാണ്. ബിസിനസ് മാനേജ്മെന്റ്, എഞ്ചിനീയറിങ്, അക്കൗണ്ടിങ്, സാമ്പത്തിക, ഊര്‍ജ, വ്യവസായ, ഇന്‍ഷുറന്‍സ് മേഖലകളിലാണ് സ്വകാര്യമേഖലയിലെ ജോലികളില്‍ സ്വദേശികളില്‍ കൂടുതലും നിയമനം നേടിയത്.

സ്വകാര്യ മേഖലയില്‍ 2021 ല്‍ 394 ഖത്തരികളാണ് ജോലി ചെയ്തിരുന്നതെങ്കില്‍ 2022 ല്‍ 1,850 പേര്‍ക്ക് കൂടി ജോലി ലഭിച്ചു. തൊഴില്‍ മന്ത്രാലയവുമായി സഹകരിക്കാനുള്ള ഖത്തര്‍ സ്വകാര്യമേഖലയുടെ പ്രതിബദ്ധതയാണ് ഇത് വ്യക്തമാക്കുന്നതെന്ന് തൊഴില്‍ മന്ത്രാലയം വിലയിരുത്തി. ഖത്തറിലെ റിക്രൂട്ട്മെന്റ് വിപണിയില്‍ 2022 മികച്ച വര്‍ഷമായിരുന്നുവെന്ന് സിവില്‍ സര്‍വീസ് ആന്‍ഡ് ഗവണ്‍മെന്റല്‍ ഡെവലപ്മെന്റ് ബ്യൂറോയിലെ നാഷണല്‍ ഹ്യൂമന്‍ റിസോഴ്സസ് ഡെവലപ്മെന്റ് ഡിപ്പാര്‍ട്ട്മെന്റ് ഡയറക്ടര്‍ ദബീഅ അല്‍ ബുവൈനൈന്‍ പറഞ്ഞു. കവാദര്‍ ഓണ്‍ലൈന്‍ പ്ലാറ്റ്‌ഫോമിന്റെ വിപുലീകരണവും സര്‍ക്കാര്‍ സ്‌കോളര്‍ഷിപ്പ് പ്രോഗ്രാമും ഇതിന് സഹായകമായതായും അദ്ദേഹം അഭിപ്രായപ്പെട്ടു.