IPL🏏’പടിയ്ക്കല്‍’ കലമുടച്ചു,റണ്ണൗട്ടില്‍ വീണ്‌ സഞ്ജു,രാജസ്ഥാന് തോല്‍വി

ജയ്പുര്‍: ഇന്ത്യന്‍ പ്രീമിയര്‍ ലീഗിലെ ആവേശകരമായ മത്സരത്തില്‍ കരുത്തരായ രാജസ്ഥാന്‍ റോയല്‍സിനെ കീഴടക്കി ലഖ്‌നൗ സൂപ്പര്‍ ജയന്റ്‌സ്. അവസാന ഓവര്‍ വരെ ആവേശം അലതല്ലിയ മത്സരത്തില്‍ 10 റണ്‍സിനാണ് ലഖ്‌നൗവിന്റെ വിജയം. ലഖ്‌നൗ ഉയര്‍ത്തിയ 155 റണ്‍സ് വിജയലക്ഷ്യത്തിലേക്ക് ബാറ്റേന്തിയ രാജസ്ഥാന് നിശ്ചിത ഓവറില്‍ ആറ് വിക്കറ്റ് നഷ്ടത്തില്‍ 144 റണ്‍സെടുക്കാനേ കഴിഞ്ഞുള്ളൂ. കണിശതയോടെ പന്തെറിഞ്ഞ ബൗളര്‍മാരാണ് ലഖ്‌നൗവിന് വിജയം സമ്മാനിച്ചത്.

ഒരു ഘട്ടത്തില്‍ അനായാസ വിജയത്തിലേക്ക് നീങ്ങുകയായിരുന്ന രാജസ്ഥാന്‍ അവിശ്വസനീയമായി തോല്‍വിയിലേക്ക് വീഴുകയായിരുന്നു. രാജസ്ഥാന്‍ ഈ സീസണില്‍ വഴങ്ങുന്ന രണ്ടാം തോല്‍വിയാണിത്. ലഖ്‌നൗ സീസണിലെ നാലാം വിജയം സ്വന്തമാക്കി.

156 റണ്‍സ് വിജയലക്ഷ്യവുമായി ബാറ്റിങ് ആരംഭിച്ച രാജസ്ഥാന് വേണ്ടി തകര്‍പ്പന്‍ തുടക്കമാണ് ഓപ്പണര്‍മാരായ ജോസ് ബട്‌ലറും യശസ്വി ജയ്‌സ്വാളും ചേര്‍ന്ന് നല്‍കിയത്. ശ്രദ്ധയോടെ ബാറ്റുവീശിയ ഇരുവരും ആദ്യ പത്തോവറില്‍ വിക്കറ്റ് നഷ്ടപ്പെടുത്താതെ 73 റണ്‍സെടുത്തു.

ആദ്യ പത്തോവറിനുശേഷം ഇരുവരും സ്‌കോറിങ്ങിന്റെ വേഗം കൂട്ടി. ജയ്‌സ്വാളാണ് കൂടുതല്‍ ആക്രമിച്ച് കളിച്ചത്. എന്നാല്‍ 12-ാം ഓവറില്‍ താരം മാര്‍ക്കസ് സ്‌റ്റോയിനിസിന് വിക്കറ്റ് സമ്മാനിച്ച് മടങ്ങി. 35 പന്തുകളില്‍ നിന്ന് 44 റണ്‍സെടുത്ത ശേഷമാണ് ജയ്‌സ്വാള്‍ മടങ്ങിയത്. ആദ്യ വിക്കറ്റില്‍ ബട്‌ലര്‍ക്കൊപ്പം 87 റണ്‍സ് കൂട്ടിച്ചേര്‍ക്കാനും താരത്തിന് സാധിച്ചു. എന്നാല്‍ പിന്നാലെ വന്ന നായകന്‍ സഞ്ജു സാംസണ്‍ അനാവശ്യ റണ്ണിന് ശ്രമിച്ച് റണ്‍ ഔട്ടായി. വെറും രണ്ട് റണ്‍സ് മാത്രമാണ് സഞ്ജുവിന് നേടാനായത്.

സഞ്ജുവിന് പിന്നാലെ നിലയുറപ്പിച്ച ജോസ് ബട്‌ലര്‍ കൂടി പുറത്തായതോടെ രാജസ്ഥാന്‍ പതറി. 41 പന്തില്‍ 40 റണ്‍സെടുത്ത ബട്‌ലറെ സ്റ്റോയിനിസ് പുറത്താക്കി. ഇതോടെ വിക്കറ്റ് നഷ്ടമില്ലാതെ 87 റണ്‍സ് എന്ന നിലയില്‍ നിന്ന് രാജസ്ഥാന്‍ മൂന്നിന് 97 എന്ന സ്‌കോറിലേക്ക് കൂപ്പുകുത്തി.

നാലാം വിക്കറ്റില്‍ ദേവ്ദത്ത് പടിക്കലും ഷിംറോണ്‍ ഹെറ്റ്‌മെയറും ഒന്നിച്ചു. എന്നാല്‍ കഴിഞ്ഞ മത്സരത്തിലെ ഹീറോയായ ഹെറ്റ്‌മെയറിന് പിടിച്ചുനില്‍ക്കാനായില്ല. വെറും രണ്ട് റണ്‍സെടുത്ത താരത്തെ ആവേശ് ഖാന്‍ പുറത്താക്കി. ഇതോടെ രാജസ്ഥാന്‍ തകര്‍ച്ച നേരിട്ടു. ഹെറ്റ്‌മെയറിന് പകരം റിയാന്‍ പരാഗ് ക്രീസിലെത്തി.

അവസാന മൂന്നോവറില്‍ 42 റണ്‍സാണ് രാജസ്ഥാന് വേണ്ടിയിരുന്നത്. സ്‌റ്റോയിനിസ് ചെയ്ത 18-ാം ഓവറില്‍ മൂന്ന് ഫോറടിച്ച് ദേവ്ദത്ത് രാജസ്ഥാന് ആശ്വാസം പകര്‍ന്നു. ഇതോടെ രണ്ടോവറില്‍ 29 റണ്‍സായി വിജയലക്ഷ്യം. നവീന്‍ ഉള്‍ ഹഖ് ചെയ്ത 19-ാം ഓവറില്‍ 10 റണ്‍സ് മാത്രമാണ് പിറന്നത്. ഇതോടെ ആവേശം അവസാന ഓവറിലേക്ക് നീങ്ങി.

ആവേശ് ഖാന്‍ ചെയ്ത അവസാന ഓവറില്‍ 19 റണ്‍സായി വിജയലക്ഷ്യം. ആദ്യ പന്തില്‍ പരാഗ് ബൗണ്ടറി നേടി. രണ്ടാംപന്തില്‍ ഒരു റണ്‍ മാത്രമാണ് പിറന്നത്. മൂന്നാം പന്തില്‍ ദേവ്ദത്ത് പുറത്തായി. 21 പന്തില്‍ 26 റണ്‍സാണ് താരത്തിന്റെ സമ്പാദ്യം. ഇതോടെ മൂന്ന് പന്തില്‍ 14 റണ്‍സായി രാജസ്ഥാന്റെ വിജയലക്ഷ്യം. തൊട്ടടുത്ത പന്തില്‍ പുതുതായി ക്രീസില്‍ വന്ന ജുറെലും പുറത്തായതോടെ ലഖ്‌നൗ വിജയമുറപ്പിച്ചു. പിന്നാലെ വന്ന അശ്വിന്‍ മൂന്ന് റണ്‍സെടുത്തും പരാഗ് 15 റണ്‍സ് നേടിയും പുറത്താവാതെ നിന്നു.

ലഖ്‌നൗവിന് വേണ്ടി ആവേശ് ഖാന്‍ നാലോവറില്‍ 25 റണ്‍സ് മാത്രം വഴങ്ങി മൂന്ന് വിക്കറ്റെടുത്തപ്പോള്‍ മാര്‍ക്കസ് സ്‌റ്റോയിനിസ് രണ്ട് വിക്കറ്റ് സ്വന്തമാക്കി.

ആദ്യം ബാറ്റുചെയ്ത ലഖ്‌നൗ നിശ്ചിത ഓവറില്‍ ഏഴ് വിക്കറ്റ് നഷ്ടത്തില്‍ 154 റണ്‍സെടുത്തു. അര്‍ധസെഞ്ചുറി നേടിയ ഓപ്പണര്‍ കൈല്‍ മായേഴ്‌സാണ് ലഖ്‌നൗവിന്റെ ടോപ് സ്‌കോറര്‍.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ ലഖ്‌നൗവിനുവേണ്ടി നായകന്‍ കെ.എല്‍.രാഹുലും കൈല്‍ മായേഴ്‌സുമാണ് ഓപ്പണ്‍ ചെയ്തത്. എന്നാല്‍ ബാറ്റിങ് പവര്‍പ്ലേയില്‍ ഇരുവര്‍ക്കും കാര്യമായ റണ്‍സ് നേടാനായില്ല. എന്നാല്‍ പവര്‍പ്ലേയ്ക്ക് ശേഷം മികച്ച കളി പുറത്തെടുത്ത ഇരുവരും ടീം സ്‌കോര്‍ 80 കടത്തി. എന്നാല്‍ 11-ാം ഓവറിലെ നാലാം പന്തില്‍ 32 പന്തില്‍ 39 റണ്‍സെടുത്ത രാഹുലിനെ ജേസണ്‍ ഹോള്‍ഡര്‍ മടക്കി. ആദ്യ വിക്കറ്റില്‍ 82 റണ്‍സ് ചേര്‍ത്തശേഷമാണ് രാഹുല്‍ മടങ്ങിയത്.

പിന്നാലെ വന്ന ആയുഷ് ബദോനി വെറും ഒരു റണ്‍ മാത്രമെടുത്ത് നിരാശപ്പെടുത്തി. നാലാമനായി വന്ന ദീപക് ഹൂഡയും (2) പെട്ടെന്ന് മടങ്ങി. ഇതോടെ ടീം തകര്‍ച്ച നേരിട്ടു. എന്നാല്‍ മറുവശത്ത് മേയേഴ്‌സ് മികച്ച പ്രകടനം പുറത്തെടുത്തു. വൈകാതെ താരം അര്‍ധസെഞ്ചുറി നേടി. എന്നാല്‍ മേയേഴ്‌സിനെ പുറത്താക്കി അശ്വിന്‍ വീണ്ടും ലഖ്‌നൗവിന് തിരിച്ചടി സമ്മാനിച്ചു. 42 പന്തില്‍ നിന്ന് 51 റണ്‍സെടുത്ത് മായേഴ്‌സ് മടങ്ങി.

പിന്നീട് ക്രീസിലൊന്നിച്ച മാര്‍ക്കസ് സ്റ്റോയിനിസ്സും നിക്കോളാസ് പൂരാനും ചേര്‍ന്ന് അവസാന ഓവറില്‍ വെടിക്കെട്ട് പ്രകടനം നടത്തിയതോടെയാണ് വലിയ തകര്‍ച്ചയില്‍ നിന്ന് ലഖ്‌നൗ രക്ഷപ്പെട്ടത്. എന്നാല്‍ അവസാന ഓവറില്‍ 21 റണ്‍സെടുത്ത സ്‌റ്റോയിനിസിനെ സന്ദീപ് ശര്‍മ പുറത്താക്കി.

പിന്നാലെ വന്ന ക്രുനാല്‍ പാണ്ഡ്യ നേരിട്ട ആദ്യ പന്തില്‍ ബൗണ്ടറി നേടി ടീം സ്‌കോര്‍ 150 കടത്തി. തൊട്ടടുത്ത പന്തില്‍ അപകടകാരിയായ നിക്കോളാസ് പൂരാനെ സഞ്ജു സാംസണ്‍ തകര്‍പ്പന്‍ റണ്‍ ഔട്ടിലൂടെ പുറത്താക്കി. 20 പന്തില്‍ 29 റണ്‍സാണ് താരത്തിന്റെ സമ്പാദ്യം. പിന്നാലെ വന്ന യുദ്ധ്‌വീര്‍ (1) അവസാന പന്തില്‍ റണ്‍ ഔട്ടായി. ക്രുനാല്‍ (4*) പുറത്താവാതെ നിന്നു.

രാജസ്ഥാന് വേണ്ടി രവിചന്ദ്ര അശ്വിന്‍ നാലോവറില്‍ വെറും 23 റണ്‍സ് മാത്രം വഴങ്ങി രണ്ട് വിക്കറ്റെടുത്തു. ട്രെന്റ് ബോള്‍ട്ട്, സന്ദീപ് ശര്‍മ, ജേസണ്‍ ഹോള്‍ഡര്‍ എന്നിവര്‍ ഓരോ വിക്കറ്റ് വീതം സ്വന്തമാക്കി.