ദുബായ്: ഇന്ത്യന്‍ രൂപയുടെ മൂല്യം റെക്കോര്‍ഡ് തകര്‍ച്ചയില്‍. യുഎഇ ദിര്‍ഹത്തിനെതിരെ 23.1389 എന്ന ഏറ്റവും കുറഞ്ഞ മൂല്യത്തിലേക്കാണ് ഇന്ത്യന്‍ രൂപ കൂപ്പുകുത്തിയിരിക്കുന്നത്. ഇതിനു മുമ്പത്തെ രൂപയുടെ മൂല്യം ഏറ്റവും കുറഞ്ഞ മൂല്യം ഒരു ദിര്‍ഹമിന് 23.1369 രുപയായിരുന്നു. ബഹ്‌റൈന്‍ ദിനാര്‍- 225.23 രൂപ, കുവൈറ്റ് ദിനാര്‍- 276.05 രൂപ, ഒമാനി റിയാല്‍- 220.59 രൂപ, സൗദി റിയാല്‍- 22.60, ഖത്തരി റിയാല്‍- 23.36 രൂപ എന്നിങ്ങനെയാണ് മറ്റ് ഗള്‍ഫ് രാജ്യങ്ങളിലെ കറന്‍സികളുമായുള്ള ഇന്ത്യന്‍ രൂപയുടെ വിനിമയ നിരക്ക്. ഗള്‍ഫ് മേഖലയിലെ കറന്‍സികളുടെ രൂപയ്‌ക്കെതിരായ വിനിമയ മൂല്യം വലിയ തോതില്‍ വര്‍ധിച്ചതോടെ നാട്ടിലേക്ക് പണമയക്കാനുള്ള തിരക്കിലാണ് പ്രവാസികള്‍.
യുഎസ് ഡോളറിനെതിരെ 84.92 രൂപയാണ് നിലവിലെ ഇന്ത്യന്‍ രൂപയുടെ മൂല്യം. ഡോളറിനെതിരെ ഇന്ത്യന്‍ രൂപയുടെ മൂല്യം ഇന്നലെ 11 പൈസ കൂടി ഇടിഞ്ഞ് 84.91 ആയിരുന്നു. എന്നാല്‍ ഇന്നും വീണ്ടും അത് കൂറയുകയായിരുന്നു. രാവിലെ 84.93 ആയി കുറഞ്ഞെങ്കിലും പിന്നീട് 84.92 ആയി. ഓഹരി വിപണികളിലുണ്ടായ നഷ്ടമാണ് രൂപയുടെ മൂല്യം ഇടിയുന്നതിന്റെ പ്രധാന കാരണമായി വിലയിരുത്തപ്പെടുന്നത്. ഡോളര്‍ സൂചികയില്‍ നേരിയ ഇടിവുണ്ടായതോടെ അമേരിക്കന്‍ ബോണ്ട് വരുമാനത്തില്‍ വന്ന വര്‍ധനയും രൂപയുടെ മൂല്യം റെക്കോഡ് തകര്‍ച്ചയിലേക്ക് കൂപ്പുകുത്താന്‍ കാരണമായി.
അമേരിക്കന്‍ പ്രസിഡന്റായി ഡൊണാള്‍ഡ് ട്രംപ് തെരഞ്ഞെടുക്കപ്പെട്ട ശേഷം ഡോളര്‍ ശക്തിപ്രാപിച്ചതാണ് ഇന്ത്യന്‍ കറന്‍സിക്ക് വലിയ തിരിച്ചടിയായത്. ട്രംപിന്റെ പുതിയ നയങ്ങള്‍ ഡോളറിനെ ശക്തിപ്പെടുത്തുമെന്ന കണക്കുകൂട്ടലിലാണിതെന്ന് വിലയിരുത്തപ്പെടുന്നുണ്ട്. മിഡിലീസ്റ്റിലെ സംഘര്‍ഷം കൂടുതല്‍ ശക്തമായ പശ്ചാത്തലത്തില്‍ അസംസ്‌കൃത എണ്ണവിലയിലുണ്ടായ വര്‍ധനവും ഇന്ത്യന്‍ രൂപയ്ക്കു തിരിച്ചടിയായി. ഇന്ത്യന്‍ സ്റ്റോക്ക് മാര്‍ക്കറ്റില്‍ നിന്നുള്ള നിക്ഷേപകരുടെ പിന്‍മാറ്റം വലിയ തോതില്‍ രൂപയെ ബാധിച്ചിട്ടുണ്ടെന്നും വിലയിരുത്തപ്പെടുന്നു.
