സിനിമ കണ്ട് അച്ഛന്‍ അമ്മയോട് മാപ്പ് ചോദിച്ചു: ഗ്രേറ്റ് ഇന്ത്യൻ കിച്ചണ്‍’ ഹിന്ദി പതിപ്പ് നായിക സന്യ
മുംബൈ: മലയാള ചിത്രമായ ഗ്രേറ്റ് ഇന്ത്യന്‍ കിച്ചണ്‍ സിനിമയുടെ ഹിന്ദി റീമേക്കായ മിസിസ് കഴിഞ്ഞ ദിവസമാണ് സീ5 ല്‍ റിലീസ് ആയത്. ബോളിവുഡ് നടി സന്യ മൽഹോത്രയാണ് ചിത്രത്തില്‍ നായിക വേഷത്തില്‍ എത്തുന്നത്.
ചിത്രത്തിന്‍റെ പ്രമോഷന്‍റെ ഭാഗമായി ഫസ്റ്റ്‌പോസ്റ്റിന് നൽകിയ പ്രത്യേക അഭിമുഖത്തിൽ സന്യ മൽഹോത്ര ഈ ചിത്രം കണ്ടതിന് ശേഷം തന്‍റെ അമ്മയോട് തന്‍റെ പിതാവ് മാപ്പ് പറഞ്ഞ അനുഭവം പങ്കുവയ്ക്കുകയാണ് ഇപ്പോള്‍.
ചിത്രത്തിലെ വീട്ടമ്മയുടെ ക്യാരക്ടര്‍ ശരിക്കും സമൂഹത്തില്‍ കാണുന്ന ഒരാളാണ്. എന്നാല്‍ അത്തരം ഒരാളായി ഞാനോ, എന്‍റെ ചുറ്റുമുള്ള സ്ത്രീകളോ മാറരുത് എന്നതാണ് ഞാന്‍ ആഗ്രഹിക്കുന്നത്. സിനിമ കണ്ടതിന് പിന്നാലെ എന്‍റെ പിതാവ് അമ്മയോട് വന്ന് ക്ഷമ ചോദിച്ചതാണ് എന്നെ സംബന്ധിച്ച് ഈ ചിത്രത്തിലെ ഏറ്റവും വലിയ പാഠം. ഒരു സ്വയം നവീകരണമാണ് ഈ ചിത്രം – സന്യ പറയുന്നു.
ഫെബ്രുവരി 7 ന് സീ5 ല്‍ മിസിസ് ഡിജിറ്റലായി റിലീസ് ചെയ്തിരിക്കുന്നത്. സംവിധായിക ആരതി കദവ് സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് ജിയോ സ്റ്റുഡിയോസിൻ്റെ ബാനറിൽ ജ്യോതി ദേശ്പാണ്ഡെയാണ്.
ഗ്രേറ്റ് ഇന്ത്യൻ കിച്ചൻ ഇതിനകം തന്നെ പാന്‍ ഇന്ത്യ തലത്തില്‍ ശ്രദ്ധേയമായ ചിത്രമാണ് അതിനാൽ ഡിജിറ്റൽ സ്‌പെയ്‌സിൽ അതിന്‍റെ ഹിന്ദിപതിപ്പ് മിസിസ് ശ്രദ്ധ നേടുമോ എന്ന് കണ്ടറിയണം. ജിയോ ബേബിയാണ് ദ ഗ്രേറ്റ് ഇന്ത്യന്‍ കിച്ചണ്‍ സംവിധാനം ചെയ്തത്.
വലിയ മാറ്റങ്ങളടെയാണ് മിസിസ് എത്തുന്നത് എന്നാണ് ട്രെയിലര്‍ നല്‍കുന്ന സൂചന. സാംസ്കാരികമായ വലിയ മാറ്റങ്ങളും കഥാപാത്രങ്ങളുടെ മാറ്റങ്ങളും ചിത്രത്തില്‍ കാണാം. 2019 ല്‍ നെറ്റ്ഫ്ലിക്സില്‍ റിലീസ് ചെയ്ത കാര്‍ഗോയ്ക്ക് ശേഷം ആരതി കദവ് സംവിധാനം ചെയ്യുന്ന ചിത്രമാണ് മിസിസ്.
