കോഴിക്കോട്: കെ.പി.സി.സി അധ്യക്ഷന്‍ കെ. സുധാകരനെതിരേ അഴിമതി ആരോപണം കടുപ്പിച്ച് മുന്‍ ഡ്രൈവര്‍ പ്രശാന്ത് ബാബു. കോടികളുടെ അഴിമതിയാണ് സുധാകരന്‍ നടത്തിയത്. കൃത്യമായ തെളിവുകളുടെ അടിസ്ഥാനത്തിലാണ് പരാതി നല്‍കിയതെന്നും പ്രശാന്ത് ബാബു പറഞ്ഞു.
വനംമന്ത്രിയായിരിക്കെ തന്നെ സുധാകരന്‍ നിരവധി അഴിമതികള്‍ നടത്തിയിരുന്നു. മുന്‍ മുഖ്യമന്ത്രി കെ കരുണാകരനെ വിറ്റ് കാശാക്കിയ ആളാണ് സുധാകരനെന്നും പ്രശാന്ത് ബാബു വിമര്‍ശിച്ചു. ആരോപണങ്ങൾക്കെല്ലാം കൃത്യമായ തെളിവ് തന്റെ പക്കലുണ്ടെന്നും പ്രശാന്ത് ബാബു പറഞ്ഞു. കൈവശമുള്ള തെളിവുകളെല്ലാം വിജിലൻസിന് നൽകിയിട്ടുണ്ടെന്നും പ്രശാന്ത് ബാബു അറിയിച്ചു.
അതേസമയം, പ്രശാന്ത് ബാബുവിന്റെ പരാതിയില്‍ സുധാകരനെതിരേ വിജിലന്‍സ് വിശദ അന്വേഷണത്തിനൊരുങ്ങുകയാണ്. അനധികൃത സ്വത്ത് സമ്പാദന പരാതിയിലടക്കം അന്വേഷണത്തിന് വിജിലന്‍സ് സര്‍ക്കാരിന് ശിപാര്‍ശ നല്‍കി. പ്രാഥമിക അന്വേഷണത്തില്‍ പരാതിയില്‍ കഴമ്പുണ്ടെന്നും തെളിവ് ശേഖരണത്തിന് വിശദമായ അന്വേഷണം വേണമെന്നുമാണ് വിജിലന്‍സ് അറിയിച്ചിരിക്കുന്നത്.
കെ. കരുണാകരന്‍ ട്രസ്റ്റുമായി ബന്ധപ്പെട്ട് സാമ്പത്തിക തിരിമറി നടത്തിയെന്നും കണ്ണൂര്‍ ഡിസിസി ഓഫീസിന്റെ നിര്‍മാണവുമായി ബന്ധപ്പെട്ട് സാമ്പത്തിക തിരിമറികള്‍ നടത്തിയെന്നുമാണ് സുധാകരനെതിരായ പരാതിയില്‍ പ്രശാന്ത് ബാബു വ്യക്തമാക്കുന്നത്.