മുംബൈ:സോഷ്യല്‍ മീഡിയയിലെ കണ്ടന്റ് ക്രിയേറ്റര്‍മാരുടെ കഥ പറയുന്ന ‘ദി ട്രൈബ്’ എന്ന സീരീസ് അടുത്തിടെയാണ് പ്രൈം വീഡിയോയില്‍ പ്രദര്‍ശിപ്പിക്കാന്‍ തുടങ്ങിയത്. നടന്‍ ചങ്കി പാണ്ഡെയുടെ സഹോദരപുത്രിയും നടി അനന്യ പാണ്ഡെയുടെ കസിനുമായ അലാന പാണ്ഡെ ഉള്‍പ്പെടെ അഞ്ച് കണ്ടന്റ് ക്രിയേറ്റര്‍മാരുടെ ജീവിതമാണ് ഈ സീരീസിലൂടെ പങ്കുവെയ്ക്കുന്നത്. കഴിഞ്ഞ ദിവസം ദി ട്രൈബിന്റെ എപ്പിസോഡില്‍ നിന്നുള്ള ചെറിയൊരു വീഡിയോ അലാന ഇന്‍സ്റ്റഗ്രാമില്‍ പങ്കുവെച്ചിരുന്നു.
അലാനയുടെ കുടുംബാംഗങ്ങളെല്ലാം ഒരുമിച്ചിരുന്ന് സംസാരിക്കുന്നതാണ് ആ വീഡിയോയിലുള്ളത്. ഇതിനിടയില്‍ അലാന ധരിച്ചിരിക്കുന്ന വസ്ത്രത്തെ കുറിച്ച് അച്ഛന്‍ ചിക്കി ചോദിക്കുന്നതും വീഡിയോയില്‍ കാണാം. ‘നീ ബ്രായുടെ മുകളില്‍ ടോപ്പ് ധരിക്കാന്‍ മറന്നുപോയോ?’ എന്നാണ് ചിക്കി ചോദിക്കുന്നത്. ഇതുകേട്ട് അമ്പരന്ന അലാന എഴുന്നേറ്റ് നിന്ന് മറുപടി നല്‍കുന്നുണ്ട്. ‘നിങ്ങള്‍ കാര്യമായിട്ട് ചോദിക്കുകയാണോ?, ഞാന്‍ ധരിച്ചിരിക്കുന്ന വസ്ത്രത്തിന് എന്താണ് പ്രശ്‌നം?’ എന്ന് ചിരിയോടെ അലാന ചോദിക്കുന്നു. പാന്റ്‌സിനൊപ്പം ഷര്‍ട്ട് ധരിക്കണമെന്നായിരുന്നു അച്ഛന്റെ മറുപടി. താന്‍ ധരിച്ചത് ബ്രായല്ലെന്നും ബ്രാലെറ്റാണെന്നും അലാന വിശദീകരിക്കുന്നുണ്ട്. എന്നാല്‍ ഇത് അംഗീകരിക്കാതിരുന്ന അച്ഛന്‍ ബ്രായുടെ മുകളില്‍ വസ്ത്രം ധരിക്കണമെന്നും അലാനയോട് പറയുന്നുണ്ട്.
ഇതിന് താഴെ അലാനയെ അനുകൂലിച്ചും പ്രതികൂലിച്ചും നിരവധി കമന്റുകളാണ് പ്രത്യക്ഷപ്പെട്ടത്. അലാനയുടെ അച്ഛന്‍ പറയുന്നത് ശരിയാണെന്നും കുടുംബത്തിനൊപ്പം ഇരിക്കുമ്പോള്‍ മാന്യമായ വസ്ത്രം ധരിക്കണമെന്നും ആളുകള്‍ കമന്റ് ചെയ്തിട്ടുണ്ട്. അതേസമയം അച്ഛനും മകളും തമ്മിലുള്ള തമാശരൂപേണയുള്ള സംഭാഷണമാണ് ഇതെന്നും കമന്റുകളുണ്ട്. മിന്റ് ക്രീം നിറത്തിലുള്ള ബ്രാലെറ്റും വെള്ള പാന്റ്‌സുമായിരുന്നു അലാനയുടെ ഔട്ട്ഫിറ്റ്.
2023 മാര്‍ച്ചിലായിരുന്നു അലാന പാണ്ഡെയുടെ വിവാഹം. ഏറെക്കാലമായി കാമുകനായിരുന്ന ഐവര്‍ മക്രേയെയാണ് അലാന ജീവിതപങ്കാളിയാക്കിയത്. ഷാരൂഖ് ഖാന്‍ ഉള്‍പ്പെടെയുള്ള ബോളിവുഡ് താരങ്ങള്‍ വിവാഹത്തില്‍ പങ്കെടുത്തിരുന്നു. നേരത്തെ മാലദ്വീപില്‍വെച്ച് ഐവര്‍ അലാനയെ പ്രൊപ്പോസ് ചെയ്തിരുന്നു. 2024 ജൂലൈയില്‍ ഇരുവര്‍ക്കും ആണ്‍കുഞ്ഞ് പിറന്നു. റിവര്‍ എന്നാണ് കുഞ്ഞിന് പേര് നല്‍കിയിരിക്കുന്നത്.
