വെഞ്ഞാറമൂട്ടില്‍ നിന്ന് കാണാതായ കുട്ടികളെ കണ്ടെത്തി

തിരുവനന്തപുരം: വെഞ്ഞാറമൂട് പുല്ലംപാറപാണയത്തു നിന്നും കാണാതായ മൂന്ന് കുട്ടികളെയും പോലീസ് കണ്ടെത്തി. പാലോട് വനമേഖലയില്‍ നിന്നാണ് ഇവരെ കണ്ടെത്തിയത്. 11, 13, 14 വയസുകാരായ ആണ്‍കുട്ടികളെ തിങ്കളാഴ്ച രാവിലെ മുതലാണ് വീട്ടില്‍ നിന്നും കാണാതായത്.

പിന്നാലെ കുടുംബങ്ങള്‍ പോലീസില്‍ പരാതി നല്‍കി. പോലീസ് ജില്ലയാകെ നടത്തിയ അന്വേഷണത്തിനൊടുവിലാണ് മൂവര്‍ സംഘത്തെ കണ്ടെത്തിയത്. അയല്‍ക്കാരും ബന്ധുക്കളുമായ മൂവരും ചേര്‍ന്ന് നാടുകാണാനിറങ്ങിയതാണെന്നാണ് സംശയിക്കുന്നത്.

കാണാതായ ഒരു കുട്ടിയുടെ വീട്ടിലെ കുടുക്ക പൊട്ടിച്ച് ലഭിച്ച 4,000 രൂപയുമായാണ് സംഘം ഒരു ദിനം കറങ്ങി നടന്നത്. പോലീസ് ഇവരില്‍ നിന്നും വിവരങ്ങള്‍ ശേഖരിച്ച ശേഷം ബന്ധുക്കള്‍ക്കൊപ്പം വിടും.