ദുബായ്: 2024 ഡിസംബർ 31ന് വിസ പൊതുമാപ്പ് പദ്ധതി അവസാനിക്കും എന്നതിനാൽ അതിനു മുൻപ് ഈ അവസരം പ്രയോജനപ്പെടുത്തണമെന്ന് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സിലെ (ജിഡിആർഎഫ്എ) ഉന്നത ഉദ്യോഗസ്ഥൻ അനധികൃത താമസക്കാർക്ക് മുന്നറിയിപ്പ് നൽകി. സെപ്റ്റംബർ ഒന്നിന് ആരംഭിച്ച പൊതുമാപ്പ് പദ്ധതി 2024 ഒക്ടോബർ 31ന് അവസാനിക്കുമെന്നായിരുന്നു ആദ്യം അറിയിച്ചിരുന്നത്. എന്നാൽ കൂടുതൽ പേർ അനധികൃതമായി രാജ്യത്ത് തങ്ങുന്നുണ്ടെന്നും അവർക്കായി പൊതുമാപ്പ് കാലാവധി നീട്ടിനൽകണമെന്നും ബോധ്യപ്പെട്ടതിന്റെ അടിസ്ഥാനത്തിൽ രണ്ട് മാസം കൂടി കാലാവധി നീട്ടി നൽകുകയായിരുന്നു.
ആയതിനാൽ, ഈ അവസരം ഉപയോഗപ്പെടുത്തി സ്റ്റാറ്റസ് ക്രമപ്പെടുത്തുന്നതിനോ പിഴകളോ പ്രവേശന വിലക്കോ ഇല്ലാതെ സ്വന്തം രാജ്യങ്ങളിലേക്ക് മടങ്ങുന്നതിനോ അനധികൃത താമസക്കാർ മുന്നോട്ടുവരണമെന്നും ജിഡിആർഎഫ്എയുടെ ഡയറക്ടർ ജനറൽ ലെഫ്റ്റനന്റ് ജനറൽ മുഹമ്മദ് അഹമ്മദ് അൽ മർരി ഓർമിപ്പിച്ചു.
‘പൊതുമാപ്പ് കാലാവധി അവസാനിക്കാൻ പോകുകയാണ്. ഇതുവരെ തങ്ങളുടെ പദവി ക്രമീകരിച്ചിട്ടില്ലാത്ത നിയമവിരുദ്ധ താമസക്കാർ അവരുടെ താമസാവകാശം ശരിയാക്കാൻ ഗ്രേസ് പിരീഡിന്റെ ശേഷിക്കുന്ന സമയം പ്രയോജനപ്പെടുത്തണം’- അദ്ദേഹം വ്യക്തമാക്കി. ഈ അവസരം മുതലെടുക്കുന്നതിൽ പരാജയപ്പെടുന്നവർക്കെതിരെ കർശനമായ പരിശോധനാ കാമ്പെയ്നുകളും ശക്തമായ നടപടികളുമാണ് വരാനിരിക്കുന്നതെന്നും അദ്ദേഹം മുന്നറിയിപ്പ് നൽകി. പൊതുമാപ്പ് പദ്ധതിയെക്കുറിച്ച് ബോധവൽക്കരണം നടത്തുന്നതിന് സമൂഹത്തിന്റെ വ്യാപകമായ പിന്തുണയും അൽ മർരി ആവശ്യപ്പെട്ടു.
എല്ലാവരും പൊതുമാപ്പിൽ സന്തുഷ്ടരാണ്. ഇത് സുഗമമായി പുരോഗമിക്കുകയാണ്. നിരവധി അനധികൃത താമസക്കാർ ഇത് പ്രയോജനപ്പെടുത്താൻ മുന്നോട്ടുവന്നു. പൊതുമാപ്പ് പ്രയോജനപ്പെടുത്തിയ പലരും പുതിയ ജോലി കണ്ടെത്തി സന്തോഷത്തോടെ രാജ്യത്ത് തുടരുകയാണെന്നും അൽ മർരി പറഞ്ഞു. എന്നിരുന്നാലും, പൊതുമാപ്പിനെ അവഗണിച്ച് രാജ്യത്ത് അനധികൃതമായി തുടരന്ന ചിലരുണ്ടെന്നും അവർ ഗുരുതരമായ ഭവിഷ്യത്തുകൾ നേരിടേണ്ടിവരുമെന്നും അദ്ദേഹം വ്യക്തമാക്കി.
“മറ്റുള്ളവരുടെ ജീവിതം എളുപ്പമാക്കുക എന്നത് ഞങ്ങളുടെ കടമയാണ്. ഈ പൊതുമാപ്പ് പ്രയോജനപ്പെടുത്താത്ത ആളുകൾ ഭാവിയിൽ സ്വയം കുറ്റപ്പെടുത്തുന്ന സ്ഥിതിയുണ്ടാവും. ഈ സംരംഭം അവസാനിക്കാൻ 15 ദിവസത്തിൽ താഴെ മാത്രമേ ഉള്ളൂ. നിങ്ങളുടെ സ്റ്റാറ്റസ് ക്രമപ്പെടുത്തുക. പിഴകൾ ഒഴിവാക്കി ഒരു പുതിയ ജീവിതം ആരംഭിക്കുക” – അദ്ദേഹം പറഞ്ഞു.
പൊതുമാപ്പ് കാലാവധി അവസാനിക്കുന്ന നിമിഷം മുതൽ കർശന പരിശോധനകളും തുടർനടപടികളും ആരംഭിക്കുമെന്ന് ഫോളോ – അപ്പ് സെക്ടർ അസിസ്റ്റന്റ് ഡയറക്ടർ ജനറൽ മേജർ ജനറൽ സലാഹ് അൽ ഖംസിയും വ്യക്തമാക്കി. “പൂർണ സുതാര്യതയോടും നീതിയോടും കൂടി നിയമങ്ങൾ നടപ്പിലാക്കാൻ ഞങ്ങൾ പ്രതിജ്ഞാബദ്ധരാണ്. കമ്മ്യൂണിറ്റി സുരക്ഷ വർധിപ്പിക്കുന്നതിനുള്ള ഞങ്ങളുടെ ശ്രമങ്ങൾ തീവ്രമായി തന്നെ തുടരും. അത് ഗ്രേസ് പിരീഡ് അവസാനിച്ചതിന് ശേഷം ഉടൻ ആരംഭിക്കും”- അൽ ഖംസി പറഞ്ഞു.
