തിരുവനന്തപുരം: ശ്രീപത്മനാഭസ്വാമി ക്ഷേത്രത്തിലെ തളിപ്പാത്രം മോഷ്ടിച്ചതല്ലെന്ന് പോലീസ്. കേസില്‍ പിടിയിലായ മൂന്ന് പേരും നിരപരാധികളെന്നും പോലീസ് വ്യക്തമാക്കി. ക്ഷേത്രദര്‍ശനത്തിനിടെ ഇവര്‍ കൊണ്ടുവന്ന തളിക പൂജാ സാധനങ്ങള്‍ കൊണ്ട് നിറഞ്ഞ നിലയിലായിരുന്നു. ഇത് ക്ഷേത്രത്തിനുള്ളില്‍ വെച്ച് മറിഞ്ഞു വീണു. ഇത് തിരികെ എടുത്തു നല്‍കാന്‍ ക്ഷേത്രത്തിലെ ജീവനക്കാരും സഹായിച്ചിരുന്നു.
ഇങ്ങനെ എടുത്ത് നല്‍കുന്നതിനിടെയാണ് കാണാതായ പാത്രവും ഉള്‍പെട്ടത്. ജീവനക്കാര്‍ തന്നതാണെന്ന് കേസില്‍ പിടിയിലായ ഗണേശ് ത്സാ നേരത്തെ പോലീസിന് മൊഴി നല്‍കിയിരുന്നു. ഇതിനെ സാധൂകരിക്കുന്ന വിവരങ്ങളാണ് പുറത്തുവരുന്നത്. ക്ഷേത്രത്തില്‍ നിന്ന് പുറത്തുവന്നപ്പോള്‍ ആരും തടഞ്ഞില്ലെന്നും ആരെങ്കിലും വിളിക്കുകയോ മടക്കിച്ചോദിക്കുകയോ ചെയ്തിരുന്നെങ്കില്‍ പാത്രം തിരികെ കൊടുക്കുമായിരുന്നുവെന്നും ഇയാള്‍ പറഞ്ഞിരുന്നു.
ഒക്ടോബര്‍ 13 ന് രാവിലെ ക്ഷേത്രത്തില്‍ മോഷണം നടന്നതായായിരുന്നു റിപ്പോർട്ടുകൾ. ഇക്കാര്യം ഒരു ഉദ്യോഗസ്ഥന്‍ 18-ാം തീയതിയാണ് സംഭവം പോലീസിലറിയിക്കുന്നത്. കേരള പോലീസ് വിവരമറിയിച്ചതിനെ തുടര്‍ന്ന് ഹരിയാണ പോലീസാണ് പ്രതികളെന്ന് സംശയിച്ചവരെ പിടികൂടുന്നത്.
