തിരുവനന്തപുരം: ലോക്സഭാ തിരഞ്ഞെടുപ്പ് ലക്ഷ്യമിട്ട് കേരളത്തിലുടനീളം പര്യടനത്തിനിറങ്ങാന് മുഖ്യമന്ത്രിയും മന്ത്രിമാരും. സംസ്ഥാനത്തെ 140 നിയമസഭാ മണ്ഡലങ്ങളിലും മുഖ്യമന്ത്രിയും മന്ത്രിമാരും പര്യടനം നടത്തും. ഇന്ന് ചേര്ന്ന മന്ത്രിസഭാ യോഗത്തിലാണ് ഇത് സംബന്ധിച്ച് തീരുമാനമുണ്ടായത്. എല്ഡിഎഫ് യോഗത്തിന്റേത് കൂടിയാണ് തീരുമാനം
നവകേരള നിര്മിതിയുടെ ഭാഗമായി സര്ക്കാര് ഉണ്ടാക്കിയ മുന്നേറ്റത്തെക്കുറിച്ച് ജനങ്ങളുമായി സംവദിക്കുന്നതിനും സമൂഹത്തിന്റെ ചിന്താഗതികള് അടുത്തറിയുന്നതിനുമാണ് പര്യടനമെന്നാണ് സര്ക്കാര് വാദം.വിവിധ മേഖലകളിലെ പ്രമുഖ വ്യക്തികളുമായുള്ള ജില്ലാതല കൂടിക്കാഴ്ചയും മണ്ഡലം കേന്ദ്രീകരിച്ച് ബഹുജന സദസ്സും നടത്തും.
നവംബര് 18 മുതല് ഡിസംബര് 24 വരെ പര്യടനം. നവംബര് 18 ന് മഞ്ചേശ്വരത്ത് മണ്ഡലം സദസ് പരിപാടിക്ക് തുടക്കം കുറിക്കും. ഓരോ മണ്ഡലത്തിലും എം.എല്.എമാര് നേതൃത്വം വഹിക്കും. സെപ്റ്റംബര് മാസത്തില് സംഘാടകസമിതി രൂപീകരണം മണ്ഡലാടിസ്ഥാനത്തില് സംഘടിപ്പിക്കും.
പരിപാടി വിജയിപ്പിക്കുന്നതിന് ജനപ്രതിനിധികളും സഹകരണ സ്ഥാപനങ്ങളും തൊഴിലാളികളും കൃഷിക്കാരും കര്ഷക തൊഴിലാളികളും മഹിളകളും വിദ്യാര്ത്ഥികളും മുതിര്ന്ന പൗരന്മാരും അടങ്ങുന്ന മണ്ഡലം ബഹുജന സദസ്സു കള് ആസൂത്രണം ചെയ്യും. മണ്ഡലം സദസ്സിനോട് അനുബന്ധിച്ച് വിവിധ കലാപരിപാടികള് സംഘടിപ്പിക്കും.
മണ്ഡലം സദസ്സില് പ്രത്യേകം ക്ഷണിതാക്കളായി സ്വാതന്ത്ര്യസ മര സേനാനികള്, വെറ്ററന്സ്, വിവിധ മേഖലകളിലെ പ്രമുഖര്, മഹിളാ, യുവജന, വിദ്യാര്ത്ഥി വിഭാഗത്തില്നിന്ന് പ്രത്യേകം തെരഞെഞ്ഞെടുക്കപ്പെട്ടവര്, കോളേജ് യൂണിയന് ഭാരവാഹികള്, പട്ടിക ജാതിപട്ടികവര്ഗ വിഭാഗത്തിലെ പ്രതിഭകള്, കലാകാരന്മാര്, സെലിബ്രിറ്റികള്, വിവിധ അവാര്ഡ് നേടിയവര്, തെയ്യം കലാകാരന്മര്, വിവിധ സാമുദായിക സംഘടനകളിലെ നേതാക്കള്, മുതിര്ന്ന പൗരരുടെ പ്രതിനിധികള്, വിവിധ സംഘടനാ പ്രതി നിധികള്, കലാസാംസ്കാരിക സംഘടനകള് ആരാധനാലയങ്ങളുടെ പ്രതിനിധികള് തുടങ്ങിയവര് പങ്കെടുക്കും.
പരിപാടി വിജയിപ്പിക്കാനാവശ്യമായ കാര്യങ്ങള് നിര്വ്വഹിക്കുന്നതിന് ചീഫ് സെക്രട്ടറിയെ ചുമതലപ്പെടുത്തിയിട്ടുണ്ട്.പരിപാടിയുടെ സംസ്ഥാനതല കോ-ഓര്ഡിനേറ്ററായി പാര്ലമെന്ററികാര്യ മന്ത്രിയെ ചുമതലപ്പെടുത്തി. ജില്ലകളില് പരിപാടി സംഘടിപ്പിക്കുന്നതിനുള്ള ചുമതല അതത് ജില്ലകളിലെ മന്ത്രിമാരെ എല്പ്പിക്കും. മന്ത്രിമാര് ഇല്ലാത്ത ജില്ലകളുടെ ചുമതല ജില്ലയുടെ ചുമതലയുള്ള മന്ത്രിമാരെ ഏല്പ്പിക്കും. ജില്ലകളില് പരിപാടിയുടെ നടത്തിപ്പിനുള്ള ചുമതല ബന്ധപ്പെട്ട ജില്ലാ കളക്ടര്ക്കായിരിക്കുമെന്നും സംസ്ഥാന സര്ക്കാര് വ്യക്തമാക്കി.