PC George : പിന്തുണ, പ്രതിഷേധം; പി സി ജോര്ജിന്റെ വാഹനത്തിനുനേരെ ചീമുട്ടയേറ്, തടഞ്ഞ് ബിജെപിയുടെ ഐക്യദാര്ഢ്യം
![](https://breakingkerala.com/wp-content/uploads/2022/05/pc-george-vehicle.webp)
തിരുവനന്തപുരം: വിദ്വേഷ പ്രസംഗത്തിന്റെ പേരില് പൊലീസ് കസ്റ്റഡിയിലെടുത്ത പി സി ജോര്ജിന്റെ (P C George) വാഹനം തടഞ്ഞ് ബിജെപി പ്രവര്ത്തകര്. തിരുവനന്തപുരത്തെ വട്ടപ്പാറക്ക് സമീപം വേറ്റിനാട് മണ്ഡപത്ത് വെച്ചാണ് ബിജെപി (BJP) പ്രവര്ത്തകര് പി സി ജോര്ജിന്റെ വാഹനത്തിന് മുന്നില് ചാടി വീണത്. പി സി ജോര്ജിന് അഭിവാദ്യങ്ങള് അര്പ്പിച്ച് കൊണ്ടും കസ്റ്റഡിയില് പ്രതിഷേധിച്ചുമാണ് ബിജെപി പ്രവര്ത്തകര് വാഹനം തടഞ്ഞത്. പിന്തുണ അറിയിച്ച ബിജെപി പ്രവര്ത്തകര്ക്ക് പി സി ജോര്ജ് നന്ദി പറഞ്ഞു. അതേസമയം, പട്ടത്ത് പി സി ജോര്ജിനെതിരെ ഡിവൈഎഫ്ഐ പ്രവര്ത്തകര് കരിങ്കൊടി പ്രതിഷേധം നടത്തി. ഡിവൈഎഫ്ഐ പ്രവര്ത്തകരെ പൊലീസ് അറസ്റ്റ് ചെയ്ത് നീക്കി. മൂന്ന് പ്രവര്ത്തകരെ അറസ്റ്റ് ചെയ്തു.വാഹനത്തിനുനേരെ ചീമുട്ടയേറുമുണ്ടായി.
പി സി ജോര്ജിന്റെ കസ്റ്റഡിയെ ബിജെപി നേതാക്കള് അപലപിക്കുകയാണ്. അദ്ദേഹം പറഞ്ഞപോലെ പലതും കേരളത്തില് നടക്കുന്നുണ്ടെന്നാണ് കുമ്മനം രാജശേഖരന് പറഞ്ഞത്. വിദ്വേഷ പ്രസംഗത്തിന്റെ പേരില് പി സി ജോര്ജിനെ വീട്ടില് അതിക്രമിച്ച് കയറി പൊലീസ് കസ്റ്റഡിയിലെടുത്തത് അഭിപ്രായ സ്വാതന്ത്ര്യത്തിലേക്കുള്ള കടന്നുകയറ്റമാണെന്ന് ബിജെപി സംസ്ഥാന അധ്യക്ഷന് കെ സുരേന്ദ്രനും പ്രതികരിച്ചു. കേരളത്തിലെ അറിയപ്പെടുന്ന മുതിര്ന്ന രാഷ്ട്രീയ നേതാവിനെ ഒരു പ്രസംഗത്തിന്റെ പേരില് പുലര്ച്ചെ വീട്ടിലെത്തി കസ്റ്റഡിയിലെടുത്ത് മൂന്ന് മണിക്കൂര് ദൂരെയുള്ള പൊലീസ് സ്റ്റേഷനിലേക്ക് കൊണ്ടുപോവുന്നത് പിണറായി സര്ക്കാരിന്റെ ഫാസിസ്റ്റ് സമീപനത്തിനുള്ള തെളിവാണെന്നും കെ സുരേന്ദ്രന് വിമര്ശിച്ചു.
മുസ്ലിം മതമൗലികവാദികള് വര്ഗീയ വിഷം ചീറ്റിയിട്ടും ഒരു നടപടിയും എടുക്കാത്ത സര്ക്കാരിന്റെ ഇരട്ടത്താപ്പാണ് പി സി ജോര്ജിനെ കസ്റ്റഡിയില് എടുത്തതോടെ വ്യക്തമാകുന്നത്. ഇസ്ലാമിക വര്ഗീയ ശക്തികള്ക്ക് എന്തും പറയാം എന്തും ചെയ്യാം, എന്നാല് ആരും ഇതിനെതിരെ പ്രതികരിക്കരുതെന്നാണ് പിണറായി വിജയന് പറയുന്നത്. അത് അംഗീകരിച്ചു തരാന് ബിജെപി തയ്യാറല്ല. ജിഹാദികള്ക്ക് മുമ്പില് മുട്ടിലിഴയുന്ന സര്ക്കാര് ഹൈന്ദവ-ക്രൈസ്തവ നേതാക്കളെ വേട്ടയാടുകയാണ്. ഇടത് സര്ക്കാരിന്റെ ജനാധിപത്യവിരുദ്ധ സമീപനത്തിനെതിരെ ബിജെപി ജനങ്ങളെ അണിനിരത്തി പ്രതിഷേധിക്കുമെന്നും സുരേന്ദ്രന് പറഞ്ഞു.
മത വിദ്വേഷ പ്രസംഗം നടത്തിയെന്ന പരാതിയില് പി സി ജോര്ജിനെതിരെ ജാമ്യമില്ലാ വകുപ്പ് പ്രകാരമാണ് പൊലീസ് കേസെടുത്ത് കസ്റ്റഡിയിലെടുത്തത്. തിരുവനന്തപുരം ഫോര്ട്ട് പൊലീസാണ് പി സി ജോര്ജിനെതിരെ കേസെടുത്തത്. ഡിജിപി അനില് കാന്തിന്റെ നിര്ദ്ദേശ പ്രകാരമാണ് നടപടി. ജോര്ജിനെതിരെ കേസ് എടുക്കണമെന്നാവശ്യപ്പെട്ട് യൂത്ത് ലീഗ് ഉള്പ്പെടെ ഡിജിപിക്ക് പരാതി നല്കിയിരുന്നു. ഹിന്ദു മുസ്ലീം വൈരം ഉണ്ടാക്കുന്ന രീതിയിലും മതസ്പര്ധ വളര്ത്തുന്ന രീതിയിലും പ്രകോപനപരമായി പ്രസംഗിച്ചതിനാണ് കേസെന്ന് എഫ്ഐആറില് പറയുന്നു.
ഹിന്ദു മഹാപരിഷത്ത് തിരുവനന്തപുരത്ത് നടത്തിയ ‘അനന്തപുരി ഹിന്ദു മഹാസമ്മേളനം’ ഉദ്ഘാടനം ചെയ്യുമ്പോഴാണ് പി സി ജോര്ജ് വിവാദ പ്രസംഗം നടത്തിയത്. പ്രസംഗത്തിലുടനീളം മുസ്ലിം സമുദായത്തെ വര്ഗീയമായി അധിക്ഷേപിക്കുകയും ബോധപൂര്വം വര്ഗീയ ചേരിതിരിവ് സൃഷ്ടിക്കാന് ശ്രമിക്കുന്നതായും ജോര്ജിനെതിരായ പരാതിയില് പറയുന്നു.
കച്ചവടം ചെയ്യുന്ന മുസ്ലീങ്ങള് പാനീയങ്ങളില് വന്ധ്യത വരുത്താനുള്ള മരുന്നുകള് ബോധപൂര്വം കലര്ത്തുന്നു. മുസ്ലീങ്ങള് അവരുടെ ജനസംഖ്യ വര്ധിപ്പിച്ച് ഇതൊരു മുസ്ലിം രാജ്യമാക്കി മാറ്റാന് ശ്രമിക്കുന്നു, മുസ്ലിം പുരോഹിതര് ഭക്ഷണത്തില് മൂന്ന് പ്രാവശ്യം തുപ്പിയ ശേഷം വിതരണം ചെയ്യുന്നു, മുസ്ലിം കച്ചവടക്കാര് അവരുടെ സ്ഥാപനങ്ങള് അമുസ്ലിം മേഖലകളില് സ്ഥാപിച്ച് അവരുടെ സമ്പത്ത് കവര്ന്നു കൊണ്ടുപോകുന്നു തുടങ്ങി വളരെ ഗൗരവമായ നുണയാരോപണങ്ങളാണ് അദ്ദേഹം പ്രസംഗിച്ചതെന്നും പരാതിയില് പറയുന്നു. മുസ്ലിം സമുദായത്തെ സംശയത്തിന്റെ മുനയില് നിറുത്താനും മറ്റു സമുദായത്തിലെ വിശ്വാസികള്ക്കിടയില് വര്ഗീയ ചേരിതിരിവ് സൃഷ്ടിക്കാനും മാത്രമാണ് കാരണമാകുകയെന്നും പരാതിയില് പറഞ്ഞിരുന്നു.