തിരുവനന്തപുരം: പട്ടികജാതി പട്ടികവര്‍ഗ വകുപ്പ് മന്ത്രി കെ രാധാകൃഷ്ണന് ഫോണില്‍ വധഭീഷണി. പട്ടികജാതി ഫണ്ട് തിരിമറിയുമായി ബന്ധപ്പെട്ട് അന്വേണത്തിന്റെ പശ്ചാത്തലത്തിലാണ് ഭീഷണി. ഇതുകൊണ്ട് പിന്തിരിയില്ല. മാന്യമായി പ്രവര്‍ത്തിക്കുന്നവരെ സര്‍ക്കാര്‍ പിന്തുണയ്ക്കും. കയ്യിട്ട് വാരുന്ന മാനസികാവസ്ഥയുള്ള ഉദ്യോഗസ്ഥരെ അത്തരത്തില്‍ നേരിടുമെന്നും മന്ത്രി പറഞ്ഞു.
തിരുവനന്തപുരം കാച്ചാണി സ്വദേശിയാണ് കഴിഞ്ഞ ദിവസം മന്ത്രിയുടെ ഓഫീസില്‍ ലാന്‍ഡ് ഫോണില്‍ വിളിച്ച് ഭീഷണിപ്പെടുത്തിയത്. ഇടനിലക്കാരനായിട്ടാണ് ഇയാള്‍ പണപ്പിരിവ് നടത്തിയത് ചോദ്യം ചെയ്തതാണ് പ്രകോപനത്തിന് കാരണമെന്നും ഇയാള്‍ക്കെതിരെ പരാതി നല്‍കിയിട്ടുണ്ടന്നും മന്ത്രിയുടെ ഓഫീസ് അറിയിച്ചു.
പിന്നോക്ക വിഭാഗത്തിന്റെ ക്ഷേമ പ്രവര്‍ത്തനത്തിനു വേണ്ടിയാണ് വകുപ്പെന്നും ഉദ്യോഗസ്ഥര്‍ മെച്ചപ്പെട്ട രീതിയില്‍ പ്രവര്‍ത്തിക്കണമെന്നും മന്ത്രി പറഞ്ഞു. തെറ്റായി കാര്യങ്ങള്‍ ചെയ്യുന്നവരെ അതേ രീതിയില്‍ കൈകാര്യം ചെയ്യും. പാവപ്പെട്ടവരെ വഞ്ചിക്കുന്നവരോട് ഒരു പരിഗണനയും ഉണ്ടാകില്ലെന്നും മാന്യമായി പ്രവര്‍ത്തിക്കുന്നവരെ സര്‍ക്കാര്‍ പിന്തുണയ്ക്കുമെന്നും അദ്ദേഹം പറഞ്ഞു.
