മലപ്പുറം: തൃശ്ശൂർ, പാലക്കാട്, മലപ്പുറം എന്നീ ജില്ലകളിൽ രാത്രികാലങ്ങളിൽ ജനലിനുള്ളിലൂടെ മോഷണം നടത്തുന്ന കുപ്രസിദ്ധ മോഷ്ടാവ് കാക്ക ഷാജിയെ താനൂർ പോലീസ് അറസ്റ്റ് ചെയ്തു. തേഞ്ഞിപ്പാലം, പരപ്പനങ്ങാടി, താനൂർ സ്റ്റേഷൻ പരിധിയിൽ റിപ്പോർട്ട് ചെയ്ത കേസിലാണ് അറസ്റ്റ്.
പരപ്പനങ്ങാടി, തിരൂർ, പൊന്നാനി എന്നീ സ്റ്റേഷൻ പരിധികളിൽ ഉറങ്ങികിടക്കുന്ന സ്ത്രീകളുടെ സ്വർണാഭരണങ്ങൾ ജനൽ വഴി മോഷണം നടത്തിയ കേസിൽ ഈ വർഷം ആദ്യം ഷാജിയെ താനൂർ പോലീസ് പിടികൂടിയിരുന്നു. തുടർന്ന് ഷാജി ജയിലിൽ നിന്നും ഇറങ്ങി മൂന്ന് മാസം തികയുന്നതിനു മുമ്പ് സമാനമായ കുറ്റകൃത്യങ്ങൾ തേഞ്ഞിപ്പാലം പരപ്പനങ്ങാടി താനൂർ സ്റ്റേഷനുകളിൽ റിപ്പോർട്ട് ചെയ്തതോടെ കേസന്വേഷണം ഷാജിയിലേക്ക് എത്തുകയായിരുന്നു.
മലപ്പുറം ജില്ലാപോലീസ് മേധാവി സുജിത് ദാസ് ഐ.പി.എസിന്റെ നിർദേശപ്രകാരം താനൂർ ഡി.വൈ.എസ്.പി മൂസ വള്ളിക്കാടന്റെ നേതൃത്വത്തിൽ ഷാജിയെ പിടിക്കുന്നതിനായി പ്രത്യേക സ്ക്വാഡ് രൂപീകരിച്ചിരുന്നു. തുടർന്ന് നടത്തിയ അന്വേഷണത്തിലാണ് ഷാജി പിടിയിലായത്. ഇൻസ്പെക്ടർ കെ.ജെ ജിനേഷ് സബ് ഇൻസ്പെക്ടർ എൻ. ശ്രീജിത്ത് സിവിൽ പോലീസ് ഓഫീസർമാരായ സലേഷ്, സബറുദ്ധീൻ, ആൽബിൻ, ഷിബിൻ എന്നിവരടങ്ങിയ സംഘമാണ് ഷാജിയെ പിടികൂടിയത്.
തീരുർ, താനൂർ, പരപ്പനങ്ങാടി, തിരൂരങ്ങാടി, പൊന്നാനി, പെരിന്തൽമണ്ണ, കുന്നംകുളം, ചങ്ങരംകുളം എന്നീ പോലീസ് സ്റ്റേഷനുകളിലായി അമ്പതോളം മോഷണക്കേസ്സുകളിൽ പ്രതിയാണ് ഷാജി. നേരത്തെ ദേഹപരിശോധന നടത്തുമ്പോൾ പോലീസ് ഉദ്യോഗസ്ഥനെ കടിച്ചു പരിക്കേൽപ്പിച്ച സംഭവത്തിലും താനൂർ പോലീസ് സ്റ്റേഷനിൽ ഷാജിക്കെതിരെ കേസുണ്ട്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
