സൂറത്ത്: ഗുജറാത്തില്‍ വിവാഹിതയായ യുവതി കാമുകനൊപ്പം ഒളിച്ചോടിയതിന് ഭര്‍ത്താവിന്റെ വീട്ടുകാരുടെ പ്രതികാരം. യുവാവിന്റെ ആറ് കെട്ടിടങ്ങള്‍ ബുള്‍ഡോസര്‍ കൊണ്ടു തകര്‍ത്തു. ഭറൂച്ച് ജില്ലയിലെ കരേലി ഗ്രാമത്തില്‍ വെള്ളിയാഴ്ച രാത്രിയിലായിരുന്നു നാടിനെ ഞെട്ടിച്ച സംഭവം. മഹേഷ് ഫുല്‍മാലി എന്ന യുവാവിന്റെ വീടും അയല്‍ക്കാരുടെയും കുടുംബാംഗങ്ങളുടേയും കെട്ടിടങ്ങളുമാണ് യുവതിയുടെ ഭര്‍ത്താവിനെയും ബന്ധുക്കളെയും ചേര്‍ന്നുള്ള സംഘം തകര്‍ത്തത്.
ഒളിച്ചോടിയ ഇരുവരെയും കണ്ടെത്താന്‍ യുവതിയുടെ കുടുംബം പലതവണ സമ്മര്‍ദ്ദം ചെലുത്തിയിരുന്നുവെങ്കിലും പ്രതീക്ഷിച്ച വിജയമൊന്നും കിട്ടിയില്ല. അതിനൊടുവിലാണ് അക്രമാസക്തരായി ഇവര്‍ യുവാവിന്റെ ആസ്തികള്‍ ലക്ഷ്യമിടുന്നത്. യുവാവിനെ കണ്ടെത്തിനല്‍കാന്‍ ആവശ്യപ്പെട്ടുകൊണ്ട് യുവതിയുടെ ഭര്‍ത്താവും കുടുബവും ചേര്‍ന്ന് മഹേഷിന്റെ വീട്ടിലെത്തി ഭീഷണി മുഴക്കിയിരുന്നു. മഹേഷിന്റെ സഹോദരിയെ ഉള്‍പ്പടെ അക്രമികള്‍ ഉപദ്രവിച്ചാതായി ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു.
തുടര്‍ന്ന് വെള്ളിയാഴ്ച രാത്രി ഒമ്പത് മണിയോടെ മഹേഷിന്റെ വീട്ടിലേക്ക് ബുള്‍ഡോസറുമായി എത്തിയ യുവതിയുടെ കുടുംബം ഇയാളുടെയും കുടുംബക്കാരുടേയും അടക്കം ആറു കെട്ടിടങ്ങള്‍ തകര്‍ക്കുകയായിരുന്നു. മകനെ കണ്ടെത്താന്‍ ഇയാളുടെ കുടുംബത്തിനാകാത്തതിനെ തുടര്‍ന്നാണ് ഇവരുടെ കെട്ടിടങ്ങള്‍ ബുള്‍ഡോസര്‍ ഉപയോഗിച്ച് തകര്‍ത്തതെന്നാണ് വിവരം. യുവാവിന്റെ അമ്മ ആറു പേര്‍ക്കെതിരെ വേഡച്ച് പോലീസ് സ്റ്റേഷനില്‍ പരാതി നല്‍കുകയായിരുന്നു.
സംഭവത്തില്‍ ബുള്‍ഡോസര്‍ ഡ്രൈവറുള്‍പ്പടെ ആറു പേരെ പോലീസ് അറസ്റ്റുചെയ്ത് ബുള്‍ഡോസര്‍ കണ്ടുകെട്ടിയിട്ടുണ്ട്. മഹേഷിനെ കണ്ടെത്തിനല്‍കാന്‍ കുടുംബത്തിന് ആകാത്തതിനാല്‍ അവരുടെ വീടിനു പുറമേയുള്ള അനധികൃത കെട്ടിടങ്ങള്‍ മാത്രമാണ് തകര്‍ത്തതെന്ന് യുവതിയുടെ കുടുംബം ആരോപിച്ചു. ഗ്രാമ തലവന്റെ സാനിധ്യത്തിലാണ് കെട്ടിടങ്ങള്‍ തകര്‍ത്തതെന്നും ഇവര്‍ പറഞ്ഞു.
