കൊച്ചി: എറണാകുളം പോത്താനിക്കാട് പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച ശേഷം ഒളിവില്‍ പോയ പ്രതി ഒരു വര്‍ഷത്തിന് ശേഷം പിടിയില്‍. മട്ടാഞ്ചേരി സ്വദേശി ജെ.എസ് അരുണ്‍ ആണ് അറസ്റ്റിലായത്. 23കാരനായ അരുണിനെ തമിഴ്‌നാട്ടിലെ വേളാങ്കണ്ണിയില്‍ നിന്നാണ് പിടികൂടിയത്. കഴിഞ്ഞ ഒരു വര്‍ഷമായി മറ്റൊരു പേരില്‍ ഇവിടെ ഒളിവില്‍ കഴിയുകയായിരുന്നു.
2018ലാണ് കേസിന് ആസ്പദമായ സംഭവം നടക്കുന്നത്. മട്ടാഞ്ചേരി സ്വദേശിയായ അരുണ്‍ കോതമംഗലം, പോത്താനിക്കാട് ഭാഗങ്ങളില്‍ ഡ്രൈവറായി ജോലി ചെയ്തിരുന്നു. ഇതിനിടെ പരിചയപ്പെട്ട പ്രായപൂര്‍ത്തിയാകാത്ത പെണ്‍കുട്ടിയെയാണ് പീഡിപ്പിച്ചത്. 2019ല്‍ പെണ്‍കുട്ടി പോത്താനിക്കാട് പോലീസില്‍ പരാതി നല്‍കി. ഇതോടെ അരുണ്‍ അവിടെ നിന്ന് കടന്നു.
അരുണ്‍ വേളാങ്കണ്ണിയിലുണ്ടെന്ന് കഴിഞ്ഞ ദിവസമാണ് പോലീസിന് രഹസ്യ വിവരം ലഭിച്ചത്. ഇതോടെ പോത്താനിക്കാട് സി.ഐ നോബിള്‍ മാനുവലിന്റെ നേതൃത്വത്തിലുള്ള പോലീസ് സംഘം വേളാങ്കണ്ണിയിലെത്തി പ്രതിയെ പിടികൂടുകയായിരുന്നു. വിവാഹിതനായിരുന്ന അരുണ്‍ ഒളിവില്‍ കഴിയവേ വേളാങ്കണ്ണി സ്വദേശിയായ യുവതിയെ വിവാഹവും കഴിച്ചിരുന്നു.
