റേഷന്‍ കാര്‍ഡ് ഉടമകള്‍ക്ക് 2500 രൂപയും ഭക്ഷ്യക്കിറ്റും; പൊങ്കല്‍ സമ്മാനവുമായി തമിഴ്നാട് സര്‍ക്കാര്‍
ചെന്നൈ: പൊങ്കലിന് തമിഴ്‌നാട്ടിലെ റേഷന്‍ കാര്‍ഡ് ഉടമകള്‍ക്ക് 2500 രൂപയും ഭക്ഷ്യക്കിറ്റും സമ്മാനമായി നല്‍കാന്‍ തമിഴ്നാട് മുഖ്യമന്ത്രി എടപ്പാടി കെ.പളനിസ്വാമി. 2021 ജനുവരി 4 മുതല്‍ ന്യായവില കടകളിലൂടെ പണവും പൊങ്കല്‍ ഗിഫ്റ്റ് ബാഗും വിതരണം ചെയ്യും. അടുത്ത വര്‍ഷം നടക്കുന്ന നിയമസഭാ തെരഞ്ഞെടുപ്പ് മുന്നില്‍ക്കണ്ടാണു മുഖ്യമന്ത്രിയുടെ പ്രഖ്യാപനം.
സംസ്ഥാനത്തെ 2.6 കോടി റേഷന്‍ കാര്‍ഡ് ഉടമകള്‍ക്കും പൊങ്കല്‍ സമ്മാനം നല്‍കാനാണ് സര്‍ക്കാര്‍ തീരുമാനം. ന്യായവില കടകളിലൂടെയുള്ള വിതരണത്തിനു മുന്‍പു ഗുണഭോക്താക്കള്‍ക്ക് അവരുടെ വീടുകളില്‍ ടോക്കണുകള്‍ എത്തിക്കും. സാധനങ്ങളും സമ്മാനങ്ങളും ലഭിക്കുന്നതിനുള്ള തീയതിയും സമയവും ടോക്കണിലുണ്ടാകും. ഇതേ സമയത്ത് എത്തിയാല്‍ മതിയാകും.
റേഷന്‍ കാര്‍ഡ് ഉടമകള്‍ക്ക് ഒരു കിലോ വീതം അരിയും പഞ്ചസാരയും, 20 ഗ്രാം കശുവണ്ടിയും ഉണക്കമുന്തിരിയും, ഒരു കരിമ്പ്, 8 ഗ്രാം ഏലയ്ക്ക എന്നിവ തുണിസഞ്ചിയില്‍ നല്‍കുമെന്നും പളനിസ്വാമി പറഞ്ഞു. നിയമസഭ തിരഞ്ഞെടുപ്പിനായി അണ്ണാ ഡിഎംകെയുടെ പ്രചാരണത്തിനും മുഖ്യമന്ത്രി തുടക്കമിട്ടു.
