കൊച്ചി: കൊല്ലത്ത് നിന്ന് കോട്ടയം വഴി എറണാകുളത്തേക്ക് സർവീസ് നടത്തുന്ന മെമു സ്പെഷ്യൽ ട്രെയിൻ ശനിയാഴ്ച കൂടി സർവീസ് നടത്തുകയും കൂടുതൽ സ്റ്റോപ്പുകൾ അനുവദിക്കുകയും ചെയ്യണമെന്ന ആവശ്യവുമായി യാത്രക്കാർ. നവംബർ 29 വരെയുണ്ടായിരുന്ന സർവീസ് ആറുമാസത്തേക്ക് കൂടി നീട്ടിയെങ്കിലും പ്രധാന ആവശ്യങ്ങൾ റെയിൽവേ പരിഗണിച്ചില്ലെന്നാണ് യാത്രക്കാർ പറയുന്നത്. തിങ്കൾ മുതൽ വെള്ളിവരെ മാത്രമാണ് മെമു സ്പെഷ്യൽ സർവീസുള്ളത്. ശനിയാഴ്ച ദിവസം യാത്രക്കാർ ഇപ്പോഴും ദുരിത യാത്രയാണ് നയിക്കുന്നത്. സർവീസ് നീട്ടുന്നതിനൊപ്പം ഇതിന് പരിഹാരമാകുമെന്ന് പ്രതീക്ഷിച്ചെങ്കിലും അതുണ്ടായില്ല.
മെമു സർവീസ് ദീർഘിപ്പിക്കുന്നതിനൊപ്പം കൂടുതൽ സ്റ്റോപ്പുകൾ അനുവദിക്കണമെന്നും സർവീസ് ആറ് ദിവസമായി ഉയർത്തണമെന്നും യാത്രക്കാരും ജനപ്രതിനിധികളും ആവശ്യപ്പെട്ടിരുന്നു. മൂന്ന് സ്റ്റോപ്പുകൾ കൂടി വേണമെന്നാണ് പ്രധാനപ്പെട്ട ആവശ്യം. എന്നാൽ 2025 മെയ് 30 വരെ സർവീസ് ദീർഘിപ്പിച്ച് ഉത്തരവിറക്കിയപ്പോഴും സ്റ്റോപ്പുകളിലും സർവീസിന്‍റെ എണ്ണത്തിലും മാറ്റം വരുത്താൻ റെയിൽവേ തയ്യാറായിട്ടില്ല.
ചെറിയനാട്, ചിങ്ങവനം, കാഞ്ഞിരമറ്റം സ്റ്റേഷനുകളിൽ കൂടി മെമുവിന് സ്റ്റോപ്പ് അനുവദിക്കണമെന്നാണ് ആവശ്യം. മാവേലിക്കര ലോക്സഭാ പരിധിയിൽ മെമുവിന് സ്റ്റോപ്പില്ലാത്ത ഏക സ്റ്റേഷനാണ് ചെറിയനാട്. മെമു ഉൾപ്പെടെ റെയിൽവേയുമായി ബന്ധപ്പെട്ട വിഷയങ്ങളിൽ നിരന്തരം ഇടപെടുന്ന മാവേലിക്കര എംപി കൊടിക്കുന്നിൽ സുരേഷ് ചെറിയനാട് കൂടി സ്റ്റോപ്പ് നേടിയെടുക്കാൻ ശ്രമം നടത്തുന്നുണ്ട്. മാവേലിക്കരയ്ക്കും ചെങ്ങന്നൂരിനും ഇടയിലാണ് ചെറിയനാട് സ്റ്റേഷൻ.
ചെറിയനാടിന് പുറമെ, ചിങ്ങവനം, കാഞ്ഞിരമറ്റം സ്റ്റേഷനുകളിൽ സ്റ്റോപ്പ് വേണമെന്ന ആവശ്യവും ശക്തമാണ്. ചങ്ങനാശേരിയ്ക്കും കോട്ടയത്തിനും ഇടയിലാണ് ചിങ്ങവനം. പിറവം റോഡിനും മുളന്തുരുത്തിയ്ക്കും ഇടയിലാണ് കാഞ്ഞിരമറ്റം റെയിൽവേ സ്റ്റേഷൻ. ചിങ്ങവനം മുതൽ ചോറ്റാനിക്കര വരെ എല്ലാ സ്റ്റേഷനിലും സ്റ്റോപ്പുകൾ വേണമെന്ന് ആവശ്യമുണ്ടെങ്കിലും ഇത് പരിഗണിക്കാൻ സാധ്യത കുറവാണ്. ഇത്തരത്തിൽ സ്റ്റോപ്പ് അനുവദിച്ചാൽ ചെറിയാനാട് ഉൾപ്പെടെ പുതിയ ആറ് സ്റ്റോപ്പുകൾ കൂടി മെമുവിന് വേണ്ടിവരും. ഈ സാഹചര്യത്തിൽ ചെറിയനാട്, ചിങ്ങവനം, കാഞ്ഞിരമറ്റം എന്നിവിടങ്ങളിലെങ്കിലും സ്റ്റോപ്പ് നൽകണമെന്നാണ് യാത്രക്കാർ ആവശ്യപ്പെടുന്നത്.
നിലവിൽ ആഴ്ചയിൽ അഞ്ച് ദിവസം മാത്രമാണ് കൊല്ലം – എറണാകുളം മെമുവിന് സർവീസുള്ളത്. തിങ്കൾ മുതൽ വെള്ളിവരെയാണിത്. പ്രവൃത്തിദിനമായ ശനിയാഴ്ച മെമു സർവീസ് ഇല്ലാത്തത് യാത്രക്കാർക്ക് തിരിച്ചടിയാവുകയാണ്. വേണാട് എക്സ്‌പ്രസിലെ തിരക്കൊഴിവാക്കാനാണ് മെമു അനുവദിച്ചതെങ്കിൽ ശനിയാഴ്ച വേണാടിനെ തന്നെ ആശ്രയിക്കേണ്ട അവസ്ഥയിലാണ് യാത്രക്കാർ.
സംസ്ഥാനത്ത് സർക്കാർ ഓഫീസുകളും സ്വകാര്യ സ്ഥാപനങ്ങളും വിദ്യാഭ്യാസ സ്ഥാപനങ്ങളുമെല്ലാം ശനിയാഴ്ച പ്രവൃത്തിദിനമാണ്. അതുകൊണ്ട് ഈ ദിവസം വേണാട് എക്സ്‌പ്രസിൽ തന്നെയാണ് മെമു യാത്രികരും പോകുന്നത്. വേണാട് എക്സ്‌പ്രസ് കരുനാഗപ്പള്ളിയിൽ എത്തുമ്പോഴേക്കും നിൽക്കാൻപോലും ഇടം ലഭിക്കുകയുമില്ല. മെമു ട്രെയിനിന്‍റെ അറ്റകുറ്റപ്പണികൾ നടത്തേണ്ടതിനാലാണ് ശനിയാഴ്ച സർവീസ് നടത്താത്തതെന്ന്‌ റെയിൽവേയുടെ വാദം.
