ഭർത്താവിന് ഓ.സി.ഡിയുണ്ടെന്ന് അറിയാതെയാണ് വിവാഹം കഴിച്ചത്; പണിപാളിയെന്ന് മനസിലായത് അപ്പോഴാണ്: നിത്യ പറയുന്നു
കൊച്ചി:മലയാളി പ്രേക്ഷകർക്ക് ഏറെ പ്രിയങ്കരിയായ നടിയാണ് നിത്യ ദാസ്. ഈ പറക്കും തളിക എന്ന ചിത്രത്തിൽ ബസന്തി എന്ന കഥാപാത്രമായി എത്തിയാണ് നിത്യ ദാസ് മലയാളികളുടെ ഹൃദയം കവർന്നത്. വളരെ കുറച്ച് സിനിമകളിൽ മാത്രം അഭിനയിച്ചിട്ടുള്ളെങ്കിലും ഇന്നും പ്രേക്ഷകരുടെ ഇഷ്ട താരമായി നിത്യ നിലകൊള്ളുന്നത് ആ ഒരൊറ്റ കഥാപാത്രത്തിലൂടെയാണ്.
ഈ പറക്കും തളികയ്ക്ക് ശേഷം നിത്യ ദാസ് നിരവധി സിനിമകളിൽ അഭിനയിച്ചെങ്കിലും പ്രേക്ഷകര്‍ക്ക് ഇന്നും താരത്തെ അറിയുന്നത് ബാസന്തി ആയിട്ടാണ്. വിവാഹ ശേഷം സിനിമയിൽ നിന്നൊക്കെ വിട്ടു നിന്ന താരം പിന്നീട് സീരിയലിലൂടെ അഭിനയത്തിലേക്ക് വന്നിരുന്നു. എന്നാൽ പിന്നീട് അതിൽ നിന്നും ബ്രേക്ക് എടുത്തു. ഇപ്പോഴിതാ, 15 വർഷത്തെ ഇടവേളയ്ക്ക് ശേഷം സിനിമയിലേക്ക് തന്നെ തിരിച്ചെത്തിയിരിക്കുകയാണ്.
പള്ളിമണി എന്ന ചിത്രത്തിലൂടെ വീണ്ടും തിരിച്ചെത്തിയിരിക്കുകയാണ്. കഴിഞ്ഞ ആഴ്ച തിയേറ്ററുകളിൽ എത്തിയ ചിത്രം പ്രദർശനം തുടരുകയാണ്. ചിത്രത്തിന്റെ പ്രമോഷന്റെ ഭാഗമായി നിരവധി അഭിമുഖങ്ങൾ നിത്യ ഈയിടെ നൽകിയിരുന്നു. കഴിഞ്ഞ ദിവസം കൗമുദി മൂവീസിന് നൽകിയ നിത്യയുടെ ഏറ്റവും പുതിയ അഭിമുഖം ശ്രദ്ധനേടുകയാണ്.
തന്റെ വിവാഹത്തെ കുറിച്ചും ഭർത്താവിനെ കുറിച്ചുമൊക്കെയാണ് നിത്യ സംസാരിച്ചത്. പഞ്ചാബിയായ അരവിന്ദ് സിംഗ് ജങ്‌വാളിനെയണ് നിത്യ വിവാഹം ചെയ്തത്. ഇന്ത്യന്‍ എയര്‍ലൈന്‍സിന്റെ ഫ്‌ളൈറ്റ് ക്രൂ മെമ്പര്‍ ആയിരുന്നു അരവിന്ദ്. ചെന്നൈയില്‍ നിന്ന് കോഴിക്കോടേക്കുള്ള ഫ്‌ളൈറ്റ് യാത്രയ്ക്ക് ഇടയിലാണ് നിത്യയും അരവിന്ദും പ്രണയത്തിലായത്. വീട്ടുകാരുടെ സമ്മത പ്രകാരം പിന്നീട് വിവാഹവും നടന്നു.
എന്നാൽ ഭർത്താവ് ഒ.സി.ഡി പ്രശ്‌നമുള്ള ആളായിരുന്നവെന്ന് കല്യാണത്തിന് മുമ്പ് തനിക്കറിയില്ലായിരുന്നു എന്ന് പറയുകയാണ് നിത്യ ഇപ്പോൾ. ഭർത്താവിന് എല്ലാം വൃത്തിയായി സൂക്ഷിക്കണമെന്നത് നിർബന്ധമാണെന്നും അതൊക്കെ ചെയ്യുന്നത് കണ്ടിട്ടാണ് വിവാഹം കഴിച്ചതെന്നും നിത്യ പറയുന്നു. എന്നാൽ അത് ഒ.സി.ഡിയുടെ ഭാഗമാണെന്ന് വിവാഹം കഴിഞ്ഞാണ് തനിക്ക് മനസിലായതെന്നും ഇപ്പോൾ ഭർത്താവിനെ പോലെ താനും മാറിയെന്നും നിത്യ പറയുന്നു. നിത്യയുടെ വാക്കുകൾ ഇങ്ങനെ.
ഇന്റർവ്യൂയിൽ പലതും തുറന്ന് പറയുന്നത് കൊണ്ട് വീട്ടിൽനിന്ന് നല്ല ചിത്ത കേൾക്കാറുണ്ട്. എല്ലാവരുടെയും വിചാരം ഭർത്താവിനെ കുറിച്ച് ഞാൻ വളരെ മോശമായിട്ടാണ് പറയുന്നതെന്നാണ്. അങ്ങനെയല്ല. ഞാൻ അദ്ദേഹത്തെക്കുറിച്ച് പറഞ്ഞതൊക്കെ സത്യമാണ്. ഞാൻ നല്ല കാര്യങ്ങളാണ് പറയുന്നത്. പക്ഷെ ആളുകൾ അതിനെ എടുക്കുന്ന രീതി വേറെയാണെന്ന് നിത്യ പറയുന്നു.
ഏതോ ഒരു അഭിമുഖത്തിൽ എന്റെ ഭർത്താവ് എല്ലാം വൃത്തിയാക്കി വെക്കുമെന്ന് ഞാൻ പറഞ്ഞു. അതിന് ഏതോ സിനിമയിൽ ജയറാമേട്ടൻ ഭാര്യ വരുന്നത് അറിഞ്ഞിട്ട് പണിക്കാരെ വെച്ച് വീട് ക്ലീൻ ചെയ്യുന്ന ട്രോൾ ഒക്കെ വെച്ച് കളിയാക്കിയത് കണ്ടു. ഞാൻ പറഞ്ഞത് സത്യമാണ്. അദ്ദേഹത്തെ അറിയുന്നവർക്കെല്ലാം അത് അറിയാം. അദ്ദേഹത്തിന്റെ ഒരു ക്വാളിറ്റിയാണ് പറഞ്ഞതെന്ന് നിത്യ കൂട്ടിച്ചേർത്തു.
ഭയങ്കര വൃത്തിയാണ്. ഒ.സി.ഡി ആണെന്നൊക്കെ പറയാം. അദ്ദേഹത്തിന്റെ കൂടെ കൂടി ഞാനും മാറി. ഇപ്പോൾ വീട് ക്ലീൻ ആയിട്ട് ഇരുന്നില്ലേൽ എനിക്കും ഭയങ്കര ബുദ്ധിമുട്ടാണ്. അദ്ദേഹത്തിന് ഒ.സി.ഡി ആണെന്ന് എനിക്ക് അറിയില്ലായിരുന്നു. എന്തുകൊണ്ടാണ് ഒരു മലയാളിയെ വിവാഹം ചെയ്യാതെ പുറത്ത് നിന്ന് വിവാഹം ചെയ്തതെന്ന് എല്ലാവരും എന്നോട് ചോദിച്ചിരുന്നു.
എന്റെ വീട്ടിൽ എന്റെ അച്ഛനേക്കാളും എല്ലാം അടക്കിവെക്കുന്നത് അമ്മയാണ്. അച്ഛൻ ഓരോ തവണ കഴിച്ചിട്ട് അതേപോലെ വെച്ച് പോകും. ഞാൻ കണ്ട ഇവിടെ ഉള്ളവരൊക്കെ ഇതുപോലെയാണ്. പക്ഷെ എന്റെ ഭർത്താവിന് എല്ലാം വൃത്തിയായും ചിട്ടയായിട്ടും ഇരിക്കണം.
അപ്പോൾ ഞാൻ വിചാരിച്ചു കല്യാണം കഴിച്ചാൽ എല്ലാ എളുപ്പമായിരിക്കുമെന്ന്, കാരണം നമുക്ക് പണിയൊക്കെ ഒന്ന് കുറഞ്ഞ് കിട്ടുമല്ലോ. പക്ഷെ ഇത് ഒ.സി.ഡിയാണെന്ന് ഞാൻ അറിഞ്ഞില്ല. പിന്നെയാണ് മനസിലായത് പണിപാളി എന്ന്, നിത്യ ദാസ് പറഞ്ഞു.
