കൊച്ചി: ദിലീപിന്റെ സുഹൃത്ത് സലീഷിന്റെ മരണം ക്രൈം ബ്രാഞ്ച് അന്വേഷിക്കും. അന്വേഷണ സംഘം സലീഷിന്റെ സഹോദരങ്ങളുടെയും കുടുംബാംഗങ്ങളുടെയും മൊഴി രേഖപ്പെടുത്തും. സലീഷ് സംവിധാനം ചെയ്ത ഷോര്ട്ട് ഫിലിമിന്റെ അണിയറ പ്രവര്ത്തകരെ അന്വേഷണ സംഘം കാണും. സലീഷിന്റെ അപകട മരണത്തില് ദുരൂഹത ഉണ്ടെന്ന് സഹോദരന് പരാതി നല്കിയിരുന്നു.
ദിലിപീന്റെ മൊബൈല് ഫോണുകള് സര്വീസ് നടത്തിയിരുന്ന സലീഷ് കാറപകടത്തില് മരിച്ചതിനെകുറിച്ച പുനരന്വേഷണം ആവശ്യപ്പെട്ട് ബന്ധുക്കള് കഴിഞ്ഞ ദിവസമാണ് അങ്കമാലി പോലീസിന് പരാതി നല്കിയത്. 2020 ഓഗസ്റ്റ് 30 നാണ് കോടകര സ്വദേശി സലീഷ് അങ്കമാലി ടെല്ക്കിന് സമീപം ഉണ്ടായ അപടകത്തില് മരിച്ചത്. മരണത്തിന് പിന്നില് ദുരൂഹതകളുണ്ടെന്ന് സംവിധായകന് ബൈജു കൊട്ടാരക്കര ഉള്പ്പെടെ ആരോപണം ഉന്നയിച്ചതിനെ തുടര്ന്നാണ് ബന്ധുക്കളുടെ നീക്കം.
അതേസമയം നടിയെ ആക്രമിച്ച കേസില് പുതിയ വെളിപ്പെടുത്തലുകളുടെ പശ്ചാത്തലത്തില് ദിലീപിന്റേയും ഒപ്പമുള്ളവരുടേയും മൊബൈല് ഫോണുകള് പരിശോധനയ്ക്ക് അയക്കുന്നത് സംബന്ധിച്ച് ഹൈക്കോടതി ഇന്ന് തീരുമാനം പറയും. ഏത് ഫോറന്സിക് ലാബിലേക്ക് ഫോണുകള് അയക്കണം എന്നത് സംബന്ധിച്ചും കോടതി നിര്ദ്ദേശം നല്കും. ഉച്ചയ്ക്ക് 1.45-നാണ് ഉപഹര്ജി പരിഗണിക്കുക. അതേസമയം അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയ കേസില് ദിലീപിന്റെ മുന്കൂര് ജാമ്യാപേക്ഷ ഹൈക്കോടതി വ്യാഴാഴ്ചയിലേക്ക് മാറ്റിയിട്ടുണ്ട്.