കോട്ടയം:കാരിത്താസ് ജംഗ്ഷന് സമീപം നിർത്തിയിട്ടിരുന്ന ലോറിയ്ക്കു പിന്നിൽ ബൈക്കിടിച്ച് സ്വകാര്യ ബസ് കണ്ടക്ടർ മരിച്ചു.ഏറ്റുമാനൂർ പട്ടിത്താനം സ്വദേശി ഷിബു ശിവനാണ് (ഒബാമ) മരിച്ചത്.
രാത്രി പത്തു മണിയോടെ എം.സി റോഡിൽ കാരിത്താസിനു സമീപം റിലയൻസ് പെട്രോൾ പമ്പിനു മുന്നിലായിരുന്നു അപകടം.ജോലി കഴിഞ്ഞ ശേഷം വീട്ടിലേയ്ക്കു മടങ്ങുകയായിരുന്നു ഷിബു.
കോട്ടയം ഭാഗത്തു നിന്നും പട്ടിത്താനത്തേയ്ക്കു വരുന്നതിനിടെ കാരിത്താസ് ഭാഗത്തു വച്ച് റോഡരികിൽ പാർക്ക് ചെയ്തിരുന്ന നാഷണൽ പെർമിറ്റ് ലോറിയുടെ പിന്നിൽ ഷിബുവിന്റെ ബൈക്ക് ഇടിക്കുകയായിരുന്നു.
ഇടിയുടെ ആഘാതത്തിൽ റോഡിൽ തലയിടിച്ച് അതിവേഗം രക്തം വാർന്നു പോയി. ഉടൻ തന്നെ, ഓടിക്കൂടിയ നാട്ടുകാർ ചേർന്ന് തെള്ളകത്തെ സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു.
റോഡരികിൽ പാർക്ക് ചെയ്തിരുന്ന നാഷണൽ പെർമിറ്റ് ലോറി ഷിബുവിന്റെ കാഴ്ചയിൽ പെടാതിരുന്നതാണ് അപകടത്തിന് കാരണമെന്നാണ് ലഭിക്കുന്ന പ്രാഥമിക വിവരം.
അഗ്നിരക്ഷാ സേനാസംഘം എത്തിയാണ് റോഡിലെ രക്തം കഴുകി നീക്കിയത്.
റോഡിൽ അശാസ്ത്രീയമായി പാർക്ക് ചെയ്ത ലോറിയാണ് അപകട കാരണമെന്ന പരാതിയിൽ ലോറി ഡ്രൈവർക്കെതിരെ കേസെടുത്തു.
കോട്ടയം – എറണാകുളം റൂട്ടിൽ സർവീസ് നടത്തുന്ന ആവേമരിയ ബസിന്റെ കണ്ടക്ടറാണ് ഷിബു.