E P JAYARAJAN🚩എല്ലാം അടിസ്ഥാന രഹിതം, വ്യക്തിഹത്യ നടത്തുന്നു; നിയമ നടപടി സ്വീകരിക്കുമെന്ന് ഇ പി ജയരാജൻ

തിരുവനന്തപുരം: തനിക്കെതിരായ മാധ്യമ വാര്‍ത്തകള്‍ അടിസ്ഥാന രഹിതമെന്ന് എല്‍ഡിഎഫ് കണ്‍വീനര്‍ ഇ പി ജയരാജന്‍. വ്യക്തിഹത്യ നടത്തുന്ന രീതിയില്‍ തനിക്കെതിരെ ഇല്ലാത്ത വാര്‍ത്തകള്‍ സൃഷ്ടിക്കുന്നവര്‍ക്കെതിരെ നിയമ നടപടി സ്വീകരിക്കും. എന്ത് നുണകളും അന്തരീക്ഷത്തില്‍ പറത്തിവിട്ട് ജനങ്ങളെ തെറ്റിദ്ധരിപ്പിക്കാമെന്ന് ആരും കരുതേണ്ടെന്നും ഇ പി ജയരാജന്‍ പറഞ്ഞു.

സിപിഎം സംസ്ഥാന സമിതി യോഗത്തില്‍ റിസോര്‍ട്ട് വിവാദത്തില്‍ ഇ പി ജയരാജനെതിരെ പാര്‍ട്ടി അന്വേഷണം നടത്താന്‍ തീരുമാനിച്ചുവെന്നും യോഗത്തിനിടെ ഇ പി ജയരാജനും പരാതി ഉന്നയിച്ചിരുന്ന സംസ്ഥാന കമ്മിറ്റി അംഗം പി ജയരാജനും തമ്മില്‍ വാക്കേറ്റമുണ്ടായെന്നുമായിരുന്നു റിപ്പോര്‍ട്ട്.

“അടിസ്ഥാന രഹിതമായ വാർത്തകൾ പ്രസിദ്ധീകരിച്ചുകൊണ്ടിരിക്കുന്നത് ഇപ്പോൾ ശ്രദ്ധയിൽപെട്ടു. വ്യക്തിഹത്യ നടത്തുന്ന രീതിയിൽ എനിക്കെതിരെ ഇല്ലാത്ത വാർത്തകൾ സൃഷ്ടിക്കുന്ന മാധ്യമങ്ങൾക്ക് എതിരെ നിയമ നടപടികൾ സ്വീകരിക്കും. എന്ത് നുണകളും അന്തരീക്ഷത്തിൽ പറത്തിവിട്ട് ജനങ്ങളെ തെറ്റിദ്ധരിപ്പിക്കാമെന്ന് ആരും കരുതേണ്ട.

ചില മാധ്യമങ്ങൾ സിപിഎം വിരോധവും ഇടതുപക്ഷ വിരോധവും നിറഞ്ഞ് അതിര് കടക്കുകയാണ്. വ്യക്തിഹത്യയിലേക്ക് ഉൾപ്പടെ ആ വിരോധം എത്തിയിരിക്കുന്നു. അത് ഒരിക്കലും അംഗീകരിച്ച് തരാനാകില്ല”- ഇ പി ജയരാജൻ ഫേസ്ബുക്കിൽ കുറിച്ചു.

റിസോർട്ട് വിവാദത്തിൽ ആരോപണവിധേയനായ ഇ പി ജയരാജനെതിരെ ഇന്ന് ചേർന്ന സംസ്ഥാന സമിതി യോഗത്തിൽ സിപിഎം അന്വേഷണം നടത്താൻ തീരുമാനിച്ചുവെന്നായിരുന്നു വിവിധ മാധ്യമങ്ങൾ റിപ്പോർട്ട് ചെയ്തിരുന്നത്. ഇതിനുള്ള അന്വേഷണ കമ്മീഷനെ പാർട്ടി ഉടൻ നിയോഗിക്കും.

വിവാദത്തിൽ തനിക്കെതിരെ ഗൂഢാലോചന നടന്നുവെന്ന ഇ പി ജയരാജൻ്റെ പരാതിയിൽ പി ജയരാജനെതിരെയും അന്വേഷണം നടത്തും. ഇതിനിടെ, സംസ്ഥാന സമിതിയിൽ ഇ പി ജയരാജനും പി ജയരാജനും തമ്മിൽ വാക്കേറ്റമുണ്ടായെന്നുമായിരുന്നു റിപ്പോർ‌ട്ട്.

കഴിഞ്ഞ സംസ്ഥാന സമിതിയിൽ പി ജയരാജൻ ഇ പി ജയരാജനെതിരെ സാമ്പത്തിക ആരോപണം ഉന്നയിച്ചതോടെയാണ് വിവാദങ്ങളുടെ തുടക്കം. കണ്ണൂർ ജില്ലയിലെ മൊറാഴയിലുള്ള ആയുർവേദ റിസോർട്ടുമായി ഇ പി ജയരാജൻ അനധികൃത സാമ്പത്തിക ഇടപാട് നടത്തിയെന്നായിരുന്നു ആരോപണം.