വടകര: മകനും ആര്.എം.പി സംസ്ഥാന സെക്രട്ടറി എന്. വേണുവിനും വന്ന ഭീഷണിക്കത്തില് പ്രതികരിച്ച് കെ. കെ രമ എം.എല്.എ. ഭീഷണിക്കത്തിന് പിന്നില് സി.പി.ഐഎമ്മാണെന്ന് കെ. കെ രമ ആരോപിച്ചു. ഇത്തരം ഭീഷണിക്കത്തുകള് ലഭിക്കുന്നത് ആദ്യമല്ല. ഇത് സംബന്ധിച്ച് പരാതി നല്കിയിട്ടുണ്ടെന്നും എന്നാല് നടപടി ഉണ്ടായിട്ടില്ലെന്നും കെ. കെ രമ പറഞ്ഞു.
സിപിഐഎമ്മിന്റെ ക്വട്ടേഷന് സംഘങ്ങള്ക്കെതിരെ നിരന്തരം സംസാരിക്കുന്നതാണ് പ്രകോപനത്തിന് കാരണം. ഓലപീപ്പി കാണിച്ച് പേടിപ്പിക്കാന് നോക്കേണ്ട. സിപിഐഎമ്മിന്റെ ഗുണ്ടാ ക്വട്ടേഷന് സംഘങ്ങള്ക്കെതിരെ ഇനിയും സംസാരിച്ചുകൊണ്ടിരിക്കുമെന്നും കെ. കെ രമ പറഞ്ഞു.
ഭീഷണി കത്തില് മകനെ പരാമര്ശിക്കുന്നത് തന്നെ ഉദ്ദേശിച്ചാണ്. മകന് രാഷ്ട്രീയത്തില് സജീവമല്ല. അവനെതിരെ അത്തരത്തില് ഒരു കത്ത് വരേണ്ട കാര്യമില്ല. ഇത് നിസാരമായിട്ടല്ല കാണുന്നത്. പരാതി നല്കിയിട്ടുണ്ടെന്നും കെ. കെ രമ പറഞ്ഞു.
ടി.പി ചന്ദ്രശേഖരന്റെ മകന് അഭിനന്ദിനേയും എന്. വേണുവിനേയും കൊലപ്പെടുത്തുമെന്നായിരുന്നു കത്തില് പറഞ്ഞത്. കെ.കെ രമയുടെ എം.എല്.എ ഓഫിസിലാണ് കത്ത് എത്തിയത്. മുന്നറിയിപ്പ് നല്കിയിട്ടും അനുസരിക്കാത്തതാണ് ടി.പി വധത്തിന് കാരണം. സിപിഐഎമ്മിനെതിരെ മാധ്യമങ്ങളില് വന്ന് ചര്ച്ച ചെയ്ത ടി.പിയെ 51 വെട്ട് വെട്ടിയാണ് തീര്ത്തത്. എം.എല്.എ രമയുടെ മകനെ അധികം വളരാന് വിടില്ല. അവന്റെ മുഖം 100 വെട്ട് വെട്ടി പൂക്കൂല പോലെ നടുറോഡില് ചിതറുമെന്നും കത്തില് പറഞ്ഞിരുന്നു.