ചെന്നൈ: ജനവാസ കേന്ദ്രങ്ങളിലിറങ്ങി ജനജീവിതം തടസപ്പെടുത്തുകയും ആക്രമണം നടത്തുകയും ചെയ്തതോടെ മയക്കുവെടിയുതിർത്ത് ഇടുക്കി ചിന്നക്കനാലിൽ നിന്ന് നാടുകടത്തിയ കാട്ടാന അരിക്കൊമ്പൻ ആരോഗ്യം വീണ്ടെടുത്തതായി തമിഴ്നാട് വനംവകുപ്പ്. അഗസ്ത്യാർമല ആനത്താര ഉൾപ്പെടുന്ന കോതയാർ മുണ്ടൻതുറൈ കടുവ സങ്കേതത്തിൻ്റെ ഉള്ളിലാണ് അരിക്കൊമ്പനുള്ളത്. പ്രദേശവുമായും മറ്റ് ആനകളുമായും അരിക്കൊമ്പൻ ഇണങ്ങിയതായി ഉദ്യോഗസ്ഥർ പറഞ്ഞു.
കഴിഞ്ഞ ഒരു മാസത്തിനിടെ ആനക്കൂട്ടങ്ങൾക്കൊപ്പം ആറുതവണ അരിക്കൊമ്പനെ കണ്ടെത്തി. ക്യാമറ ട്രാക്ക് ഉപയോഗിച്ച് നടത്തിയ നിരീക്ഷണത്തിലാണ് ആനക്കൂട്ടത്തിനൊപ്പം അരിക്കൊമ്പനെ കാണാനായത്.
ശരീരത്തിൽ ഘടിപ്പിച്ചിരിക്കുന്ന റേഡിയോ കോളറിൽ നിന്ന് വിവരങ്ങൾ ലഭ്യമാകുന്നുണ്ട്. ആനക്കൂട്ടങ്ങളുമായി ഇണങ്ങിയെങ്കിലും ഒറ്റയ്ക്ക് നടക്കുന്ന പഴയ ശീലം അരിക്കൊമ്പന് ഇപ്പോഴുമുണ്ടെന്നാണ് വനം വകുപ്പ് വ്യക്തമാക്കുന്നത്.
ആനക്കൂട്ടത്തിനൊപ്പം അരിക്കൊമ്പൻ ചേർന്നതായി തമിഴ്നാട് വനം വകുപ്പ് മുൻപ് വ്യക്തമാക്കിയിരുന്നു. ആനയുമായി ബന്ധപ്പെട്ട വിശദ റിപ്പോർട്ട് വകുപ്പ് സെക്രട്ടറിക്കും ഹൈക്കോടതിക്കും കൃത്യമായ സമയങ്ങളിൽ കൈമാറുന്നുണ്ട്. അരിക്കൊമ്പനുമായി ബന്ധപ്പെട്ട ഹർജികൾ മദ്രാസ് ഹൈക്കോടതിയിൽ തുടർച്ചയായി എത്തുന്ന സാഹചര്യത്തിലാണ് റിപ്പോർട്ട് കൈമാറുന്നത്. അരിക്കൊമ്പൻ്റെ വിവരങ്ങൾ പുറത്തുവിടണമെന്നതടക്കമുള്ള വിവരങ്ങൾ ആവശ്യപ്പെട്ടാണ് തുടർച്ചയായി ഹർജികൾ എത്തുന്നത്.
തമിഴ്നാട്ടിലെത്തിയ അരിക്കൊമ്പൻ ഇപ്പോൾ അരുമൈ മകൻ എന്നാണ് അറിയപ്പെടുന്നത്. ജനവാസ കേന്ദ്രങ്ങളിലേക്ക് മടങ്ങിയെത്തുമോ എന്ന ആശങ്കയിൽ ഏർപ്പെടുത്തിയിരുന്ന ശക്തമായ നീരീക്ഷണം ഇപ്പോഴില്ല. പ്രത്യേക ഫീൽഡ് സ്റ്റാഫിനെ പിൻവലിച്ചുവെങ്കിലും ആൻ്റി പോച്ചിംങ് സ്ക്വാഡിൻ്റെയും റിസർവിനുള്ള വയർലെസ് കേന്ദ്രവും സൈലൻ്റ് ഡ്രോണുകളും അരിക്കൊമ്പനെ കൃത്യമായ ഇടവേളകളിൽ നിരീക്ഷിക്കുകയും വിവരങ്ങൾ ശേഖരിക്കുകയും ചെയ്യുന്നുണ്ട്.
കെറ്റിഎംആർ ഫീൽഡ് ഡയറക്ടർ – ചിഫ് വൈൽഡ് ലൈഫ് വാർഡൻ എന്നിവർക്കാണ് അരിക്കൊമ്പൻ്റെ ചുമതലയുള്ളത്. ഇതുകൂടാതെ കളക്കാട്, അംബാദമുദ്രം ഉൾപ്പെടെയുള്ള നാല് റേഞ്ച് ഫോറസ്റ്റ് ഓഫീസർമാർ നേരിട്ട് ചുമതലയും വഹിക്കുന്നുണ്ട്. അരിക്കൊമ്പനെ നിരീക്ഷിക്കാൻ 36 പേരടങ്ങുന്ന പ്രത്യേക സംഘത്തെയാണ് തമിഴ്നാട് വനം വകുപ്പ് നിയോഗിച്ചിരുന്നത്. അരിക്കൊമ്പൻ പ്രദേശവുമായി ഇണങ്ങിയതോടെ ഇവരുടെ എണ്ണം വെട്ടിക്കുറച്ചിരുന്നു.
