ഹൈദരാബാദ്: ഹൈദരാബാദിലെ വീട്ടില്‍ കയറിയ കള്ളനെ യുഎസ്സിലിരുന്ന് പിടികൂടി വീട്ടുടമസ്ഥന്‍. വീട്ടില്‍ സ്ഥാപിച്ച അത്യാധുനിക സിസിടിവി ക്യാമറകളുടെ സഹായത്തോടെയാണു ഹൗസിങ് കോളനിയിലെ വീട്ടില്‍ കയറിയ കള്ളനെ പിടിച്ചത്. അടച്ചിട്ട വീടുകളില്‍ മാത്രം കവര്‍ച്ച നടത്തി കുപ്രസിദ്ധനമായ ടി രാമകൃഷ്ണന്‍ എന്ന കള്ളനാണ് അറസ്റ്റിലായത്.
ബുധനാഴ്ച പുലര്‍ച്ചെയാണ് സംഭവം. ഹൈദരാബാദ് പോലീസ് സ്റ്റേഷന്‍ പരിധില്‍പ്പെട്ട കുക്കാട്ടുപള്ളി ഹൗസിങ് കോളനിയിലെ അടച്ചിട്ട വീട്ടിലാണ് കള്ളന്‍ കയറിയത്. അമേരിക്കയില്‍ കഴിയുന്ന ഉടമ വീടിനു ചുറ്റും ആളുകളുടെ സാന്നിധ്യമുണ്ടായാല്‍ അലര്‍ട്ട് നല്‍കുന്ന അത്യാധുനിക സിസിടിവി ക്യാമറകള്‍ സ്ഥാപിച്ചിരുന്നു.
ഇതൊന്നുമറിയാതെ കള്ളന്‍ വീടിന്റെ പൂട്ടുപൊളിച്ച് അകത്തു കയറി വാതിലടച്ച് ഉള്ളില്‍നിന്നു കുറ്റിയിട്ടു. പെട്ടെന്ന് ആരെങ്കിലുമെത്തിയാല്‍ വീട്ടുകാര്‍ ഉറങ്ങുകയാണെന്നേ തോന്നൂ. പക്ഷേ ഉറങ്ങാതിരുന്ന ക്യാമറക്കണ്ണുകള്‍ ഇതെല്ലാം ഒപ്പിയെടുത്തു, ഉടമയെ അറിയിച്ചുകൊണ്ടിരുന്നു. ദൃശ്യങ്ങള്‍ കണ്ടു ഞെട്ടിയ ഉടമ നേരെ പോലീസിനെയും അയല്‍വാസികളെയും വിവരമറിയിച്ചു.
ഹൈദരാബാദ് സ്റ്റേഷനിലെ ഇന്‍വെസ്റ്റിഗേറ്റീവ് ഇന്‍സ്‌പെക്ടറും രണ്ടു കോണ്‍സ്റ്റബിള്‍മാരും വീട്ടിലെത്തി കതകില്‍ മുട്ടി. പക്ഷേ ആരും വാതില്‍ തുറന്നില്ല. പിന്നീട് ഇന്‍സ്‌പെക്ടര്‍ ജനല്‍വഴി അകത്തു കയറി പരിശോധിച്ചു. വീട്ടിലെ അലമാരകളും മേശകളും തുറന്നു പണവും ആഭരണങ്ങളും വിലപിടിപ്പുള്ള സാധനങ്ങളും എടുത്തുകൊണ്ടുപോകാനായി ഒരുക്കിവച്ചതായി കണ്ടെത്തി.
വിശദമായ പരിശോധനയില്‍ കിടപ്പുമുറിക്കകത്ത് കള്ളനുണ്ടെന്നു മനസ്സിലായി. കീഴടങ്ങിയില്ലെങ്കില്‍ വെടിവച്ചിടുമെന്ന മുന്നറിയിപ്പ് നല്‍കിയതോടെ
കട്ടിലിന്റെ അടിയില്‍ ഒളിച്ചിരുന്ന കള്ളന്‍ പുറത്തിറങ്ങി. വീട്ടില്‍ കള്ളന്‍ കയറുന്നതിന്റെയും പിടികൂടൂന്നതിന്റെയും ദൃശ്യങ്ങള്‍ ഉടമ ട്വിറ്ററില്‍ പങ്കുവച്ചതോടെയാണു വിവരം പുറംലോകം അറിഞ്ഞത്.